Անցյալ տարվա սեպտեմբերին ընտրարշավի ժամանակ Բրազիլիայի նախագահ Ժաիր Բոլսոնարուի վրա դանակով հարձակված տղամարդը դատարանի որոշմամբ հոգեկան հիվանդ է ճանաչվել և արդարացվել: Այս մասին հայտնում է BBC News-ը:
Բրազիլիայի օրենսդրության համաձայն՝ նախագահի վրա հարձակված Ադելիո Բիսպո դե Օլիվեյրային չի կարելի դատել, քանի որ իր գործողությունները չի կառավարել, եզրակացրել է դաշնային դատավորը:
Ընդ որում՝ դատավորը հայտարարել է, որ Օլիվեյրան վտանգ է ներկայացնում և անորոշ ժամանակով նրան հսկողության տակ պահելու որոշում է կայացրել, մինչ համապատասխան բուժում կստանա:
Բոլսոնարուն հայտարարել է, որ վերաքննիչ բողոք կներկայացնի:
«Ես կկապվեմ իմ իրավաբանի հետ: Հնարավոր ամեն ինչ կանեմ»,- լրագրողներին ասել է նա:
Նախագահը, որը հարձակումից հետո ծանր վիրահատության է ենթարկվել, կարծում է, որ իր դեմ մահափորձը քաղաքական դրդապատճառով էր:
«Նրանք փորձել են ինձ սպանել: Ես վստահ եմ ովքեր են, բայց չեմ կարող որև մեկին մեղադրել: Սա նախագահի թեկնածուի դեմ կատարված հանցագործություն է, որը հիմա մանդատ ունի, և մենք պետք է հանգենք իրավիճակի վերջնական հանգուցալուծման»,- ասել է Ժաիր Բոլսոնարուն:
Վճիռը հրապարակվել է դե Օլիվեյրային հոգեբուժարան ուղակելու դատավորի որոշումից հետո մի քանի շաբաթ անց:
64-ամյա Ժաիր Բոլսոնարուն անցյալ տարվա սեպտեմբերին նախընտրական արշավի ժամանակ աղիքների շրջանում ստացել էր խորը, կյանքի համար վտանգավոր վնասվածքներ և որովայնին դանակի հարվածի հետևանքով կորցրել արյան 40 տոկոսը: