Ճապոնիան Չինաստանի հետ կարծիքներ է փոխանակում Ուկրաինայում տիրող իրավիճակի վերաբերյալ և շարունակում է պնդել այս հարցում պատասխանատու մոտեցման վրա։ Այս մասին հայտարարել է վարչապետ Ֆումիո Կիսիդան:
Այսպիսով, նա մեկնաբանել է Ուկրաինայում հակամարտության քաղաքական կարգավորման ծրագիրը, որն ավելի վաղ առաջարկել էր ՉԺՀ-ն։ Ճապոնիայի վարչապետի խոսքով՝ խաղաղ բանակցությունների հարցում առաջին հերթին անհրաժեշտ է հաշվի առնել ուկրաինական կողմի կարծիքը։
Փետրվարին Չինաստանի ԱԳՆ-ն ներկայացրել էր Ուկրաինայում խաղաղ կարգավորման ծրագիր։ Փաստաթուղթը բաղկացած է 12 կետից, դրա առանցքային կետերն են՝ խաղաղ բանակցությունների վերսկսումը և ռազմական գործողությունների դադարեցումը։ Պեկինը կողմերին կոչ է արել հարգել բոլոր երկրների ինքնիշխանությունը, հարգել ՄԱԿ-ի կանոնադրությունը և հրաժարվել սառը պատերազմի մտածելակերպից։