Մերձավոր Արևելքում ռազմական գործողությունները նոր թափ են ստացել, երբ իրանական անօդաչու թռչող սարքերը հարվածել են Դուբայի միջազգային օդանավակայանին: Արաբական Միացյալ Էմիրությունների կառավարությունը հաստատել է, որ հարձակման հետևանքով չորս մարդ է վիրավորվել, սակայն նշել է, որ օդանավակայանը շարունակում է աշխատել:
Հարձակումը տեղի է ունեցել Պարսից ծոցում իրանական ուժերի կողմից իրականացվող լայնածավալ գործողությունների ֆոնին, որոնք թիրախավորում են նաև առևտրային նավերը Հորմուզի նեղուցում: CBS News-ի հաղորդմամբ՝ Իրանի հեղափոխության պահապանների կորպուսը հայտարարել է, որ հարվածները հասցվել են այն նավերին, որոնք անտեսել են իրենց նախազգուշացումները: Միջադեպերի հետևանքով Իրաքի ափերի մոտ զոհվել է հնդիկ նավաստի, ինչը մեծացրել է միջազգային առևտրային երթուղիների անվտանգության վերաբերյալ մտահոգությունները:
Ռազմական լարվածությունը հանգեցրել է նավթի գների կտրուկ աճի. Brent տեսակի նավթի մեկ բարելի արժեքը գերազանցել է 100 դոլարը: Չնայած ԱՄՆ-ի և Միջազգային էներգետիկ գործակալության կողմից ռազմավարական պաշարներից նավթի դուրսբերմանը՝ շուկաները շարունակում են անկայուն մնալ: ՄԱԿ-ի Անվտանգության խորհուրդը 13 կողմ ձայնով ընդունել է բանաձև՝ պահանջելով Իրանից անհապաղ դադարեցնել հարձակումները ծոցի երկրների վրա, մինչդեռ Շվեյցարիան անվտանգային ռիսկերի պատճառով ժամանակավորապես փակել է իր դեսպանատունը Թեհրանում: