Ապրիլի 8-ին Դուբլինում երկրորդ օրն անընդմեջ շարունակվում են վառելիքի բարձր գների դեմ բողոքի ցույցերը։ Տրակտորներից, բեռնատարներից և ավտոբուսներից բաղկացած դանդաղաշարժ շարասյուները կաթվածահար են արել քաղաքի կենտրոնական փողոցները, այդ թվում՝ Օ’Քոնել փողոցն ու կամուրջը։ Բողոքի ակցիաները, որոնք սկսվել են Մերձավոր Արևելքում հակամարտության և Հորմուզի նեղուցի փակման հետևանքով վառելիքի գների կտրուկ աճից հետո, լուրջ խոչընդոտներ են ստեղծել հանրային տրանսպորտի և շտապօգնության ծառայությունների համար։
Ցուցարարները պահանջում են կառավարությունից արագ միջոցներ ձեռնարկել վառելիքի գների կայունացման համար՝ նախազգուշացնելով, որ գործող գնային քաղաքականությունը սպառնում է տրանսպորտային և գյուղատնտեսական ոլորտի բիզնեսների գոյատևմանը։ Շատ ձեռնարկատերեր նշում են, որ նախկինում հայտարարված աջակցության փաթեթները այլևս բավարար չեն գնաճի պայմաններում։
Իռլանդիայի վարչապետ Միքոլ Մարտինը և արդարադատության նախարար Ջիմ Օ’Քալահանը հայտարարել են, որ թեև կառավարությունը հարգում է բողոքի իրավունքը, սակայն քաղաքային ենթակառուցվածքների կաթվածահարումն ու շտապօգնության աշխատանքի խոչընդոտումն անընդունելի են։ Չնայած ոլորտային կազմակերպությունների կոչերին՝ կառավարությունը դեռևս չի հայտարարել լրացուցիչ ֆինանսական աջակցության մասին՝ նախընտրելով պահպանել բյուջետային զսպվածությունը մինչև հոկտեմբերյան բյուջեի քննարկումները։