Եվրասիական տնտեսական միության երկրները դեռևս պատրաստ չեն Չինաստանի հետ ազատ առևտրի գոտու (ԱԱԳ) ստեղծմանը: Հայտարարել է Եվրասիական տնտեսական հանձնաժողովի առևտրի նախարար Վերոնիկա Նիկիշինան:
«Ներկա փուլում ԵԱՏՄ-ի անդամ պետությունների բիզնեսը դեռևս պատրաստ չէ պաշտպանել Չինաստանի հետ շուկաների լիաֆորմատ բացումը, ինչպես դա պահանջում են ԱԱԳ-ի ստեղծման կանոնները»,-ասել է Նիկիշինան: Նրա խոքսով` նախքան նման բանակցություններ սկսելը, պետք է վերլուծել այդ քայլի հնարավոր հետևանքները:
«ԵԱՏՄ-ի անդամ պետությունների տնտեսությունը բնավ միատարր չէ, ուստի պահանջվում է գնահատել օգուտներն ու ռիսկերը անդամ պետություններից յուրաքանչյուրի համար, ընդ որում՝ սեկտորների ու ճյուղերի կտրվածքով, իսկ մի շարք դեպքերում՝ կոնկրետ ապրանքների կտրվածքով»,-պարզաբանել է նա:
Նիկիշինան հիշեցրել է, որ անցյալ տարվա մայիսին ԵԱՏՄ-ն և Չինաստանը համաձայնագիր են ստորագրել առևտրատնտեսական համագործակցության մասին: «Չինաստանն արդեն վավերացրել է այդ համաձայնագիրը: Եվրասիական տնտեսական հանձնաժողովը և ԵԱՏՄ-ի անդամ պետություններն ավարտում են անհրաժեշտ ընթացակարգերը: Այդ կապակցությամբ ենթադրում ենք, որ ամենամոտ ժամանակներս համաձայնագիրն ուժի մեջ կմտնի»«-հայտարարել է նա:
Այդ համաձայնագիրը չի նախատեսում մաքսատուրքերի նվազեցում կամ ծառայությունների ու պետական գնումների շուկաների բացում: Բայց այն թույլ է տալիս էականորեն նվազեցնել առևտրում առկա խոչընդոտները, քանի որ դրանց մեծ մասը, Նիկիշինայի խոսքով, դրսևորվում է ոչ թե մաքսատուրքերում, այլ հավաստագրման, տեխնիկական կարգավորման ոլորտում և վարչական այլ ընթացակարգերում: