«Հրապարակ» օրաթերթը գրում է․
««Իմ քայլի» պատգամավոր Էդգար Առաքելյանի հրաժարվելը մանդատից ոմանք բացատրեցին թիմի հետ ունեցած տարաձայնություններով և պատգամավորի սկզբունքային դիրքորոշմամբ, սակայն մեր աղբյուրները հայտնում են, որ իրականում դա տեղի է ունեցել «պատժիչ» գործողությունների շրջանակներում՝ Նիկոլ Փաշինյանին հակադրվելու համար։
Մանդատից հրաժարվելու հայտարարությունից առաջ Առաքելյանին, ով օրեր առաջ Ամուլսարի հարցով դեմ էր արտահայտվել իշխանական տեսակետին, տեսել են ԱԺ բուֆետում Ռուբեն Ռուբինյանի հետ բարձրաձայն վիճելիս, ինչ-որ բաներում արդարանալիս։ Իսկ Ռուբինյանը փաշինյանական թևի ամենակարկառուն ներկայացուցիչն է՝ նրա աջ թևը խմբակցությունում։
Մեր աղբյուրների վկայությամբ, նախօրեին խմբակցությունում կոշտ խոսակցություն է ընթացել։ Բոլորին զգուշացրել են, որ սեփական կարծիք հայտնել կարող են, քանի դեռ խմբակցության ամփոփ որոշումը չկա, իսկ երբ վերջնական որոշում է կայացվում, մեկ մարդու նման պետք է կողմ քվեարկեն և կողմ արտահայտվեն։ Նիկոլ Փաշինյանը խիստ զայրացել է խմբակցության ղեկավարի վրա, նրան մեղադրել թուլության, իրավիճակին չտիրապետելու մեջ։ Անգամ ասել է, որ եթե այսպես շարունակվի, ԱԺ-ն կցրեմ։ Ապա, ըստ ամենայնի, որոշել են կոնկրետ մարդկանց էլ պատժել, որ բոլորի աչքը վախենա, և նման ընդվզումներ առաջիկայում չլինեն։ Մի քանի հոգի էլ կան «սև ցուցակում», օրինակ՝ Սոֆյա Հովսեփյանը, Միքայել Զոլյանը և այլք։ Թեև հնարավոր է, որ նրանց դեպքում սահմանափակվեն «դեղին քարտ» ցույց տալով»:
Ամբողջական հոդվածը կարող եք կարդալ թերթի այսօրվա համարում:
