Ադրբեջանում Եվրամիության դեսպան Պետեր Միխալկոն հիասթափություն է հայտնել Ադրբեջանում մարդու իրավունքների վիճակի կապակցությամբ:
Այս մասին նա գրառում է արել «X»-ի իր միկրոբլոգում՝ նշելով.
«Ես ապշած էի Ադրբեջանում վերջերս ձերբակալված որոշ լրագրողների նկատմամբ արժանապատվությունը նվաստացնող վերաբերմունքի մասին հաղորդումներից:
Մասնավորապես՝ երիտասարդ կանանց նկատմամբ, որոնց ձեռնաշղթաներ են հագցնում, դատարանի դահլիճում նստեցնում ապակե վանդակներում կամ մերժում են մարդկային տարրական կարիքները: Յուրաքանչյուր ոք ունի արժանապատվության և հարգալից վերաբերմունքի իրավունք»:
Ավելի վաղ հայտնել էինք, որ Ադրբեջանում նախորդ ամիս ձերբակալվել էր հետաքննող լրագրող Հաֆիզ Բաբալին: Նա ութերորդ ԶԼՄ ներկայացուցիչն է, որը ձերբակալվել էր մեկ ամսից էլ քիչ ժամանակահատվածում։