Եվրահանգրվան

EUMM մանդատը Հայաստանում երկարաձգվեց մինչև 2027թ․. Պարեկություն՝ Մարտունիում

Եվրամիությունը ևս երկու տարով երկարաձգել է Հայաստանում իր քաղաքացիական առաքելության մանդատը՝ հաստատելով առաքելության շարունակական ներկայությունը մինչև 2027 թվականի փետրվարի 19-ը։ Հայաստանում ԵՄ առաքելության X-ի էջում նշվում է, որ մանդատային խնդիրները մնում են անփոփոխ, և առաքելությունը շարունակելու է գործել որպես անզեն քաղաքացիական դիտորդական առաքելություն։

ԵՄ առաքելության ղեկավար Մարկուս Ռիտերը անձամբ միացել է Մարտունիում անցկացված պարեկային խմբին՝ գնահատելու Հայաստան-Ադրբեջան սահմանին տիրող իրավիճակը։ Պարեկները հանդիպել են տեղի գյուղացիների հետ, ինչը, ըստ Ռիտերի, առաքելության հանդեպ ձևավորված վստահության վկայությունն է։ Նա շնորհակալություն է հայտնել գյուղացիներին հյուրընկալության համար և ընդգծել, որ առաքելությունը հավատարիմ կմնա տարածաշրջանի անվտանգությանը։

Չնայած Ադրբեջանը շարունակում է քննադատել առաքելության ներկայությունը՝ այն անվանելով «միջամտություն տարածաշրջանային կայունությանը», ԵՄ դիտորդները շարունակում են գործել Հայաստանի և Ադրբեջանի սահմանագծի ողջ երկայնքով, ներառյալ Նախիջևանի հատվածը։ ԵՄ որոշումը առաքելության երկարաձգման վերաբերյալ վկայում է Եվրոպական միության շարունակական հետաքրքրվածության մասին՝ որպես տարածաշրջանային անվտանգության երաշխավոր։

Հարավային Կովկասում լարվածության պահպանման ֆոնին առաքելության դերը որպես անկախ դիտորդական կառույց կարևոր նշանակություն ունի։ Չնայած առաքելության սահմանափակ ռեսուրսներին, այն մնում է ստաբիլիզացնող գործոն, հատկապես երբ Հայաստանը խորացնում է եվրաինտեգրման գործընթացը։

ԵՄ առաքելության երկարաձգումը ևս երկու տարով ցույց է տալիս, որ Եվրոպական միությունը պատրաստ է շարունակել իր ներկայությունը Հայաստանում՝ կանխելով տարածաշրջանային բախումները և խթանելով անվտանգության ամրապնդման գործընթացները։ Թեև առաքելությունը զուտ դիտորդական բնույթ ունի, նրա քաղաքական և դիվանագիտական կարևորությունը գնալով աճում է՝ Հարավային Կովկասի փոփոխվող աշխարհաքաղաքական իրավիճակում։

ԱՄԵՆԱԴԻՏՎԱԾՆԵՐԸ

ՎԵՐ