Դեկտեմբերի 22-ին Մոսկվայում մեքենայի պայթյունի հետևանքով զոհվել է Ռուսաստանի զինված ուժերի օպերատիվ պատրաստության վարչության ղեկավար, գեներալ Ֆանիլ Սարվարովը։ Նախնական տվյալներով, պայթուցիկ սարքը տեղադրված է եղել մեքենայի տակ, ինչի հետևանքով Սարվարովը մահացել է հիվանդանոցում՝ ստացած ծանր վնասվածքներից։ Քննչական մարմինները դեպքը որակել են որպես սպանություն, և ուսումնասիրում են ուկրաինական հատուկ ծառայությունների հնարավոր ներգրավվածությունը։
Սարվարովը մեծ փորձ ունեցող զինվորական էր. նա մասնակցել է Օսեթա-Ինգուշական հակամարտությանը, Չեչենյան պատերազմներին, իսկ 2015-16 թվականներին մասնակցել է Սիրիայում ռազմական գործողությունների պլանավորմանն ու իրագործմանը։ 2016 թվականից ղեկավարել է Ռուսաստանի զինված ուժերի օպերատիվ պատրաստության վարչությունը։
Ռուսաստանում վերջին տարիներին հաճախակի են դարձել բարձր պաշտոնյաների դեմ մահափորձերը՝ պայթյունների և սպանությունների տեսքով, որոնցից մի քանիսը կապվել են ուկրաինական կողմի հետ։ Սարվարովի սպանությունը նոր լուրջ հարված է ռուսական զինված ուժերի ղեկավարությանը և ընդգծում է անվտանգային սպառնալիքների աճը երկրի ներսում։