Կանադացի երգիչ և դերասան Գարուն «La Tribune dimanche»-ին տված հարցազրույցում բացահայտել է իր անձնական կյանքի անսպասելի մանրամասները: 53-ամյա արտիստը պատմել է, որ իր ծնունդը բժշկական տեսանկյունից անհնար էր համարվում, քանի որ մորը նախապես տեղեկացրել էին, որ նա այլևս երեխաներ չի ունենա: Ըստ Գարուի՝ նրա ծնողները որոշել էին խորհրդակցել գուշակի հետ, ով խորհուրդ էր տվել չեղարկել վիրահատությունը՝ կանխատեսելով հղիությունը, ինչն էլ իրականացել է երեք ամիս անց:
Այս պատմությունը, որը Գարուն ներառել է իր «Solo» բեմական շոուում, ցույց է տալիս այն սերը, որով շրջապատված է եղել երգիչը մանկուց: Նա նշել է, որ 2020 թվականի համավարակը ստիպել է իրեն վերադառնալ Քվեբեկ և փոխել ապրելակերպը՝ հրաժարվելով մշտական շարժումից և հանրային ուշադրությունից: Այժմ նա ապրում է հանգիստ կյանքով, զբաղվում է թխկու օշարակի արտադրությամբ և կենտրոնացած է ավելի անկեղծ երաժշտություն ստեղծելու վրա:
Ներկայումս Գարուն շրջագայում է Կանադայում, իսկ նոյեմբերից սկսած կներկայացնի իր ծրագիրը Ֆրանսիայում և այլ ֆրանկոֆոն երկրներում: Նա նաև աշխատում է իր նոր՝ «Un meilleur lendemain» ալբոմի վրա, որտեղ հանդես է գալիս որպես սեփական երգերի հեղինակ՝ պահպանելով իր անձնական և ստեղծագործական հավասարակշռությունը։