Այսօր ՀՀ ԱԺ արտահերթ նիստում ելույթ ունեցավ նաև անկախ պատգամավոր Արման Բաբաջանյանը։
«Այսօր մենք ականատես ենք մի զարհուրելի պատկերի։ Մեր աչքի առաջ մենք տեսնում ենք, թե ինչպես է փլուզվում համոզումը այն իրողության, թե Ռուսաստանը ուզի՝ այս տարածաշրջանում էսկալացիա չի լինի, պատերազմ չի լինի և արդյունքում պարզվում է, թե մենք ինչպիսի կեղծիքի, ինչպիսի ստի մեջ ենք ապրել», – ասաց Բաբաջանյանը։
Նա նշեց, որ՝ Ադրբեջանը թքած ունենալով Ռուսաստանի և ՀԱՊԿ-ի վրա, անցել է սահմանը Սյունիքում, Գեղարքունիքում և կարող ենք հաստատապես ասել, որ եթե Ադրբեջանը վստահ լիներ, որ Ռուսաստանը կատարելու է Հայաստանի առջև ռազմավարական գործընկերոջ իր ուղիղ պարտականությունները, սահմանային այս միջադեպերը տեղի չէին ունենա, քանի որ սահմանային ճշգրտումներն ավարտվել էին պատերազմից հետո և նոր ճշգրտումների անհրաժեշտություն չպիտի ծագեր, եթե չլիներ նոր էսկալացիա առիթ և պատուհան, որը կարող էր ստեղծվել Լավրովի Բաքու այցից հետո և Հայաստանում Խորհրդարանի արձակումից անմիջապես հետո։
«Սրանք ուղղակի նշանային կարևորություն ունեն այս իրավիճակում։ Ըստ էության՝ մենք հիմա գործ ունենք Լավրովի մի նոր պլանի հետ և պետք է ուղղակի Հայաստանի պատկան մարմինները փորձեն հասկանալ, թե ինչ նոր պլան է իրագործվում Ռուսաստանի կողմից։ Ռուսաստանը ինքը պետք է հասկանա, որ եթե հարցը մեր օգտին չլուծվի՝ տուժողը միայն Հայաստանը չի լինելու, տուժողը հավասարապես լինելու է նաև Ռուսաստանը։ Եթե Ռուսաստանն ու ՀԱՊԿ-ը շարունակելու են խուլ և կույր ձևանալ Հայաստանի միջազգային սահմանի մասին, քանի որ մենք պաշտոնապես չենք խնդրել, չենք աղաչել, չենք աղերսել ՀԱՊԿ-ին և Ռուսաստանին, հարցը պետք է անհապաղ տեղափոխել ԵԱՀԿ և ՄԱԿ-ի անվտանգության խորհրդի հարթակներ, ինչպես արդեն առաջարկել է Ֆրանսիայի նախագահը նախօրեին», – նշեց պատգամավորը։
Նա կարծիք հայտնեց, որ ՀԱՊԿ-ի կողմից բավարար արձագանքի բացակայության դեպքում Հայաստանի խորհրդարանը լրջագույն անելիքներ ունի և իրենք պետք է մտածեն 2012 թվականին Խորհրդարանի կողմից ընդունված մի համաձայնագրի չեղարկման մասին, որը, ըստ էության, պարտավորեցնում է ՀԱՊԿ անդամ յուրաքանչյուր երկրի այլ ռազմաքաղաքական դաշինքի հետ որևէ հարաբերություն հաստատելու համար ՀԱՊԿ-ի բոլոր անդամների համաձայնությունը։
«Պիտի խոստովանենք, որ Հայաստանի նկատմամբ Ռուսաստանն իրեն պահում է սերիական բռնարարի նման։ Սա անթույլատրելի է։ Դուրս գանք զոհի մասին մեր պատկերացումներից և տեր կանգնենք մեր երկրին։ Ժամանակ կորցնելու իրավունք չունենք։ Ոչ Ռուսաստանը, ոչ ՀԱՊԿ-ը չեն պահելու մեր հայրենիքը։ Մեր հայրենիքի պաշտպանությունը բացառապես մեր գործն է, և Հայաստանն այս ճակատագրական փուլում պիտի իր պատրաստակամությունը հայտնի համագործակցելու ուժային այն կենտրոնների հետ, ովքեր արդեն առաջարկել են իրենց ուղերձներով ռազմական օգնություն Հայաստանին», – խոսքն ավարտելուց ընդգծեց Բաբաջանյանը։