Նորզելանդական սննդի արտադրության հսկա Heinz Wattie’s-ը հայտարարել է, որ նախատեսում է դադարեցնել սառեցված բանջարեղենի, սուրճի և որոշ այլ ապրանքատեսակների արտադրությունը։ Ընկերության այս քայլը վտանգում է շուրջ 350 աշխատատեղ։ Նախատեսվում է փակել երեք գործարաններ Օքլենդում, Քրայսթչերչում և Դանիդինում, ինչպես նաև դադարեցնել փաթեթավորման գործընթացները Հասթինգսում։
Ընկերության ղեկավարությունը որոշումը բացատրում է գլոբալ գնաճով և ոլորտում առկա լուրջ տնտեսական խնդիրներով։ Վերջին տարիներին ընկերությունը զգալի ֆինանսական կորուստներ է գրանցել, ինչը ստիպել է վերանայել բիզնեսի հետագա ռազմավարությունը։ Ըստ ֆինանսական հաշվետվությունների՝ Heinz Wattie’s-ը 2024 թվականին գրանցել է ավելի քան 187 միլիոն դոլարի վնաս։
Աշխատողների շահերը ներկայացնող E tū արհմիությունը խստորեն քննադատել է այս որոշումը՝ նշելով, որ այն ծանր հարված է հասցնում տասնամյակներ շարունակ ընկերությանը հավատարիմ մնացած աշխատակիցներին։ Արհմիության ներկայացուցիչները մտահոգություն են հայտնել հատկապես սեզոնային աշխատողների ճակատագրի վերաբերյալ, որոնք կարող են մնալ առանց փոխհատուցման։ Ընկերությունը հայտարարել է, որ խորհրդակցություններ կսկսի աշխատակիցների, մատակարարների և տեղական այլ շահագրգիռ կողմերի հետ՝ իրավիճակը քննարկելու համար։