«Չաարատ Կապան» ՓԲԸ–ի, Կապանի լեռնահարստացման նախկին կոմբինատի մոտ 400 աշխատակիցներ հինգշաբթի՝ ապրիլի 8-ին, հրաժարվել են աշխատանքի դուրս գալ և հանք մտնել, գրում է Aravot-ը։
Ինչպես Aravot.am-ի հետ հեռախոսազրույցում նշել են աշխատակիցները, տնօրինությունից պահանջում են աշխատանքային պայմանների անվտանգության ապահովվում, աշխատավարձի բարձրացում, արտահագուստի, մասնավորապես դիմակի ապահովում։
«Սաղ օրը փոշին շնչում ենք։ Ստանում ենք միջինը 80-120 հազար դրամ, ամեն ինչ թանկացել է։ Մեխանիզմների մասեր չեն փոխում, պահանջում են որակ ապահովել, սենց ոնց աշխատենք», – ասել է հանքագործներից մեկը` չցանկանալով, որ անունը հրապարակվի։
Ընկերության տնօրինությունը 15 հոգու ժամանակավորապես տուն է ուղարկել՝ վճարելով աշխատավարձի 2/3 մասը։ «Մենք կանգնեցինք մեր ընկերների կողքին, այլևս չենք կարող լռել», – ասել է զրուցակիցը։
Բողոքավորների հետ հանդիպել է տնօրեն Դավիթ Թովմասյանը։ Վերջինս ասել է, որ երկրում ստեղծված պատերազմական ու համավարակի պատճառով մի քիչ թերացումներ եղել են, բայց կշտկվեն։ Թովմասյանը հանքագործներին առաջարկել է աշխատել նույն պայմաններով, մինչև կկարգավորվի։ Կոմբինատի աշխատակիցները մերժել են տնօրենի այս, ինչպես նաև այն առաջարկը, որ աշխատավարձի 2/3 մասով մնան տներում, մինչև տնօրինությունը ի վիճակի լինի հարցերը լուծելու։ «Այս պայմանին էլ համաձայն չենք, նստենք տանը, ի՞նչ անենք, սոված մնանք», – ասել է Aravot-ի զրուցակիցը։