ԱՄՆ Միջազգային զարգացման գործակալության աջակցությամբ Երևանում տեղի ունեցավ հայերեն տեքստը բանավոր խոսքի վերածող հավելվածի պաշտոնական շնորհանդեսը, որն ուղղված է հաշմանդամություն ունեցող անձանց սոցիալական ներառման և մատչելիության ապահովմանը։ Այս նորարարական գործիքը մշակվել է «Հաշմանդամություն ունեցող անձանց իրավունքների օրակարգ» ՀԿ-ի կողմից՝ «Դիմոքրըսի Ինթերնեյշնլ» կազմակերպության հետ համագործակցությամբ իրականացվող «Սոցիալական պաշտպանություն, ներառում և հզորացում» ծրագրի շրջանակում։
Հավելվածը թույլ է տալիս տեսողության կամ հաղորդակցման դժվարություններ ունեցող անձանց օգտվել համակարգչից, ծանոթանալ փաստաթղթերին և լսել բնականին մոտ հայերեն խոսք։ ԱՄՆ ՄԶԳ հայաստանյան առաքելության տնօրեն Ջոն Ալելոն իր ելույթում ընդգծեց, որ այս գործիքը միայն տեխնոլոգիական լուծում չէ, այլ համատեղ հանձնառության արդյունք՝ ստեղծելու հավասար հնարավորություններ յուրաքանչյուրի համար։
Հավելվածի կիրառության շրջանակները ներառում են կրթական հարթակներ, հանրային ծառայություններ, բանկային համակարգեր և աջակցող տեխնոլոգիաներ, որոնք կօգնեն ապահովել ավելի ներառական և ինքնուրույն կյանք հաշմանդամություն ունեցող անձանց համար։ Ծրագրի ղեկավար Լիզբեթ Զոնեվելդը նշեց, որ այս նախաձեռնությունը նպատակ ունի բարելավել հանրային ծառայությունների մատչելիությունը և խթանել աջակցող միջոցների կիրառությունը։
Միջոցառման ընթացքում կազմակերպվեց պանելային քննարկում՝ սոցիալական պաշտպանության ոլորտում տեխնոլոգիաների դերի վերաբերյալ, ինչպես նաև «Մատչելիություն և ներառում» տեխնոլոգիական էքսպո, որտեղ ներկայացվեցին այլ նորարարական լուծումներ։ Պետական գերատեսչությունների, միջազգային կազմակերպությունների և քաղաքացիական հասարակության ներկայացուցիչները քննարկեցին ներառականության խթանման ռազմավարությունները և նորարարական գործիքների ազդեցությունը։
ԽՈՐՀՈւՐԴ Է ՏՐՎՈւՄ ԿԱՐԴԱԼ
