ՀՀ-ում ԻԻՀ արտակարգ և լիազոր դեսպան Խալիլ Շիրղոլամիի մամուլի ասուլիսում հնչած հայտարարությունների կապակցությամբ, ՆԳՆ-ն հայտնում է, որ գերատեսչությունը շարունակելու է խաղաղ հավաքների սպասարկումը՝ օրենքով սահմանված կարգով։ Դեսպանության անվտանգության ապահովումը և բնականոն գործունեության պայմանների երաշխավորումը հանդիսանում են ՀՀ-ի միջազգային պարտավորությունները։ ՆԳՆ-ն ընդգծել է, որ բոլոր հավաքները սպասարկվել են օրենսդրությամբ սահմանված կարգով, և ապահովվել է ինչպես հավաքների մասնակիցների, այնպես էլ դեսպանատան շենքի անվտանգությունը։
Ավելին, ՆԳՆ-ն տեղեկացրել է, որ հավաքներից մեկի ընթացքում տեղի ունեցած իրավախախտման պատճառով մեկ անձ ենթարկվել է վարչական ձերբակալման։ Հայաստանի Հանրապետությունը, որպես ժողովրդավարական պետություն, պարտավոր է չխոչընդոտել քաղաքացիների ազատ տեղաշարժի և խաղաղ հավաքների իրավունքի իրացմանը։ Այս մասին նշված է նախարարության հաղորդագրության մեջ։
Հիշեցնենք, որ Իրանի դեսպանը մտահոգություն էր հայտնել, որ Թեհրանում ձևավորվում է այնպիսի պատկերացում, թե Հայաստանը դառնում է Իրանի դեմ թշնամաբար տրամադրված ուժերի գործունեության կենտրոն՝ հաշվի առնելով բողոքի այն ակցիաները, որոնք տեղի են ունենում դեսպանատան առջև։