ԵԽԽՎ Հայաստանի հարցով համազեկուցողները մտահոգված են Ադրբեջանի զինված ուժերի կողմից ենթադրյալ պատերազմական հանցագործությունների և անմարդկային վերաբերմունքի մասին հաղորդումներով:
«Մենք անհանգստացած ենք Ադրբեջանի զինված ուժերի կողմից ենթադրյալ ռազմական հանցագործությունների կամ անմարդկային վերաբերմունքի մասին բազմաթիվ հաղորդումներով», – ասել են Հայաստանի պարտավորությունների և հանձնառությունների մոնիտորինգի գծով Եվրոպայի խորհրդի խորհրդարանական վեհաժողովի համազեկուցողներ Կիմմո Կիլյունենը և Բորիանա Աբերգը:
«Մենք նշում ենք, որ Ադրբեջանի զինվորական դատախազությունը որոշել է հետաքննել փաստերը և հույս ունենք, որ այդ հետաքննությունները կլինեն հրապարակային և թափանցիկ։ Մինչ երկու կողմերը միմյանց մեղադրում են ռազմական գործողությունների վերսկսման համար, ադրբեջանական զինուժը օկուպացրել է Հայաստանի տարածքը՝ խախտելով Հայաստանի տարածքային ինքնիշխանությունը և ԵԽ կանոնադրությամբ հակամարտությունները խաղաղ ճանապարհով կարգավորելու Ադրբեջանի պարտավորությունը»,- հավելել են համազեկուցողները։
«Ուստի Ադրբեջանի իշխանություններին կոչ ենք անում անհապաղ հետ քաշվել Հայաստանի տարածքի բոլոր հատվածներից և ազատ արձակել իրենց վերահսկողության տակ գտնվող ռազմագերիներին։ Միայն դիվանագիտական միջոցները կարող են հանգեցնել տևական ու արդար կարգավորման, որն օգուտ կբերի երկու պետությունների բնակչությանը»,- եզրափակել են նրանք։
![](https://azat.tv/wp-content/uploads/2022/09/azattvlogoblack.png)