Interfax լրատվական գործակալությանը տված հարցազրույցի ժամանակ ՀՀ ԱԳՆ ղեկավար Զոհրաբ Մնացականյանը շեշտել է, որ Թուրքիայի ապակայունացնող քաղաքականությունն ու ագրեսիան սպառնալիք է ներկայացնում իր հարևան բոլոր տարածաշրջանների համար:
Այն հարցին, թե Թուրքիայի աջակցությունը Բաքվին «կրակի վրա յուղ է լցնում» և ճնշում է թե կոնֆլիկտի կարգավորման հնարավորությունը, նախարարը ընդգծել է, որ հուլիսի 12-ից հետո միջազգային հանրությունը բռնությունը դադարեցնելու բազմաթիվ կոչեր է արել:
«Միակ երկիրը, որը փորձեց չնվազեցնել լարվածությունը և անկայունություն մտցնել տարածաշրջանում, դա Թուրքիան էր: Թուրքիայի ապակայունացնող քաղաքականությունն ու ագրեսիան սպառնալիք է ներկայացնում իր հարևան բոլոր տարածաշրջանների համար: Այսօր Թուրքիան փորձում է իր ապակայունացնող քաղաքականությունը ներդնել Հարավային Կովկասի տարածաշրջանում: Դա լուրջ մտահոգություն է առաջացնում: Թուրքիան շարունակում է իր գործողություններով սպառնալիք ցուցադրել Հայաստանի անվտանգության համար»,- նշել է Զոհրաբ Մնացականյանը։
Նախարարը հավելել է, որ Հայաստանը աշխատելու է իր անվտանգության հետագա ամրապնդման, այդ թվում իր գործընկերների հետ համագործակցության ճանապարհով։
