Երևան քաղաքի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, ԵԿՄ նախկին նախագահ Մանվել Գրիգորյանի և Նազիկ Ամիրյանի գործով դատական նիստը հետաձգվեց մինչև 14։00-ն:
Պատճառն այն է, որ Մանվել Գրիգորյանը դատական նիստին ներկա չէր:
Պաշտպանները հայտնեցին, որ եղել են «Նաիրի» բկ-ում, բժիշկները Մ․ Գրիգորյանին թույլատրել են ներկա գտնվել դատական նիստին, ինչին ամբաստանյալը համաձայն է։ Ամբաստանյալի պաշտպաններն ասացին, որ տեղափոխման խնդիր կա, քանի որ Մ․ Գրիգորյանին կաթիլային սարք է միացված։ Դատարանը որոշեց դատական նիստը հետաձգել մինչև ժամը 14։00-ը՝ Մանվել Գրիգորյանի ներկայությունն ապահովելու համար։
Հիշեցնենք, որ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նազիկ Ամիրյանը մեղադրվում է ամուսնու, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ ապօրինի կերպով իրենց պատկանող երեք տներում ռազմամթերք, պայթուցիկ նյութեր պահելու, ինչպես նաև տարբեր տեսակի հափշտակություններ կատարելու մեջ։