«Մատանիների տիրակալը» ֆենթեզի եռերգության հիման վրա նոր սերիալի նկարահանումներն անցկացվելու են Նոր Զելանդիայում: Այդ մասին հայտնել է Amazon ընկերությունը:
Ավելի վաղ ընկերությունը հայտնել էր, որ սերիալի հեռուստատեսային ցուցադրման իրավունք է ձեռք բերել, սերիալ, որը հիմնված է անգլիացի գրող Ջոն Ռոնալդ Ռուել Թոլքինի եռերգության վրա:
Սերիալն կունենա մի քանի եթերաշրջան, դրանցում կցուցադրվեն սյուժեներ, որոնք նախորդում են եռերգության առաջին մասի՝ «Մատանու եղբայրությունը» վեպի իրադարձություններին: Նաև սպասվում է, որ կնկարահանվեն լրացուցիչ սերիաներ՝ սփին-օֆեր: «Մենք երջանիկ ենք պաշտոնապես հաստատելու, որ Նոր Զելանդիան կդառնա մեր սերիալի նկարահանումների վայրը, որը հիմնված է Ջոն Թոլքինի «Մատանիների տիրակալը» վեպի պատմությունների վրա»,- մամուլի տեղեկագրում մեջբերված են գործադիր պրոդյուսերների՝ Ջեյ դի Փեյնի և Պատրիկ Մաքքեյի խոսքերը:
Ինչպես հաղորդում է Guardian թերթը, Նոր Զելանդիայի գլխավոր մրցակիցը Շոտլանդիան էր: Սակայն, հրատարակության տվյալներով, նկարահանումների վայր դառնալու իրավունքի համար պայքարում Շոտլանդիայի «պարտության» հիմնական պատճառներից մեկը դարձել է Brexit-ի պատճառով ստեղծված անկայուն իրադրությունը: Նկարահանումների անցկացման պարտավորագրի արժեքը կազմել է 1,3 մլրդ նորզելանդական դոլար (823,7 միլիոն ԱՄՆ-ի դոլար): Ըստ թերթի գնահատումների, «Մատանիների տիրակալի» մոտիվներով սերիալն ամենաթանկը կդառնա պատմության մեջ:
Նկարահանումները կսկսվեն առաջիկա ամիսներին Օքլենդում: Նոր Զելանդիայի մայրաքաղաքը՝ Վելինգթոնը, նույնպես դիտարկվում էր որպես նկարահանումներ անցկացման հնարավոր վայր, սակայն այդ գաղափարից ստիպված էին հրաժարվել, քանի որ քաղաքում բոլոր նկարահանող ստուդիաների հարթակներն զբաղեցրել է հոլիվուդյան ռեժիսոր Ջեյմս Քեմերոնը, որը նկարահանում է «Ավատար» ֆիլմի սիքվելները: Թոլքինի «Մատանիների տիրակալը» ֆենթեզի եռերգությունը 20-րդ դարի ամենահայտնի ստեղծագործություններից մեկն է, այն գրվել է 1937 և 1949 թվականների միջև ընկած ժամանակաշրջանում: Վեպը թարգմանվել է ավելի քան 30 լեզվով, հաղորդել է ՌԻԱ Նովոստին:
Աղբյուրը՝ 168.am
