Մեկանգամյա պլաստիկի սպառման սահմանափակումը Հայաստանում ոչ միայն բնապահպանական, այլև քաղաքական ու տնտեսական կարևոր քայլ է.
Շրջակա միջավայրի նախարարի տեղակալ Արա Մկրտչյանն օրենսդիրի քննարկմանն է ներկայացրել ««Առևտրի և ծառայությունների մասին» օրենքում փոփոխություն և լրացում կատարելու մասին» և կից ներկայացված օրենքների նախագծերի փաթեթը։
Նախագծերի փաթեթով առաջարկվում է 2027 թվականի հունվարի 1-ից առևտրի, հանրային սննդի օբյեկտներում, առևտրի իրականացման վայրերում, շրջիկ առևտրի կետերում, տոնավաճառներում, ցուցահանդես-վաճառքներում, ինչպես նաև բացօթյա առևտրի իրականացման դեպքում արգելել պոլիէթիլենային պարկերի ու տոպրակների, պլաստիկից պատրաստված մեկանգամյա օգտագործման տարաների և սպասքի վաճառքը կամ առկայությունը:
Բացառություն է սահմանված աղբի համար նախատեսված երկրորդային հումքից արտադրված պարկերի, ինչպես նաև կշռափաթեթավորման համար օգտագործվող կափարիչով պլաստիկ տարաների համար:
Արգելքը խախտելու համար սահմանվել է պատասխանատվություն՝ առաջին անգամ խախտելու դեպքում նախազգուշացում, իսկ երկրորդ և հաջորդող դեպքերի համար տուգանք՝ 100-ից 150 հազար դրամի չափով:
«Մեկանգամյա պլաստիկի սպառման սահմանափակումը Հայաստանում ոչ միայն բնապահպանական, այլև քաղաքական ու տնտեսական կարևոր քայլ է»,- նշել է Արա Մկրտչյանը՝ պատասխանելով պատգամավորների հարցերին:
Անդրադարձ է կատարվել թղթե պարկերի, մեկանգամյա օգտագործման սպասքի, կտորից կամ այլ թույլատրելի հումքից պատրաստված պարկերի կիրարկության արդյունավետությանը, էկոլոգիական խնդիրների լուծմանը միտված քայլերին:
Եզրափակիչ ելույթում նախարարի տեղակալն անդրադարձել է պատգամավորների կողմից բարձրացված հարցերին ու դիտարկումներին: