Նիժնի Նովգորոդի քաղաքապետարանի մամուլի ծառայության հաղորդմամբ՝ Նիժնի Նովգորոդում կանգնեցվել է կոմպոզիտոր Արամ Խաչատրյանի հուշարձանը:
Կոմպոզիտորի հուշարձանը գտնվում է Արամ Խաչատրյանի անվան արվեստի դպրոցի մոտ: Բացման արարողությանը ներկա է եղել Նիժնի Նովգորոդի ղեկավար Յուրի Շալաբաևը և նշել, որ հուշարձանի հարակից տարածքում պետք է ավելի շատ բուսականություն լինի, տեղադրվի լուսավորություն: Քաղաքի ղեկավարը հավելել է, որ հուշարձանի շուրջ տարածությունը պետք է լցված լինի կյանքով, լինի թեմատիկ՝ կապված կոմպոզիտորի ստեղծագործության կամ երաժշտության հետ:
Հուշարձանի քանդակագործը Հայաստանի վաստակավոր նկարիչ, ՅՈՒՆԵՍԿՕ-ի նկարիչների միջազգային ֆեդերացիայի անդամ Միքայել Սողոյանն է:
Նիժնի Նովգորոդի արվեստի դպրոցի ուսումնադաստիարակչական աշխատանքների գծով փոխտնօրեն Սվետլանա Իսաևան ասել է, որ Խաչատրյանի երաժշտությունը ոգեշնչման և անձնական մոտիվացիայի աղբյուր է շատ ստեղծագործողների համար:
