Պուտինն ու Ալիևը հեռախոսազրույց են ունեցել

Ռուսաստանի նախագահ Վլադիմիր Պուտինն այսօր հեռախոսազրույց է ունեցել Ադրբեջանի նախագահ Իլհամ Ալիևի հետ։ Նրանք զրուցել են Ալիևի և Հայաստանի վարչապետ Նիկոլ Փաշինյանի՝ Վիեննայում անցկացված հանդիպման վերաբերյալ։ Այս մասին հայտնում է ՌԴ նախագահի կայքը։

«Վլադիմիր Պուտինն ընդգծել է Երևանի և Բաքվի միջև բանակցային գործընթացի ակտիվացման կարևորությունը։ Արտահայտել է Ռուսաստանի պատրաստակամությունը հետագայում նույնպես աջակցություն ցուցաբերելու Լեռնային Ղարաբաղի հակամարտության խաղաղ կարգավորման ուղիների որոնման հարցում, մասնավորապես ԵԱՀԿ Մինսկի խմբի համանախագահության ձևաչափով»,- ասվում է հաղորդագրության մեջ։

Երկու նախագահները քննարկել են նաև երկու երկրների երկկողմ օրակարգն ու հաստատել երկկողմ հետաքրքրությունը բոլոր ոլորտներում համագործակցությունը զարգացնելու ուղղությամբ։