Ռուսաստանի նախագահ Վլադիմիր Պուտինը հունիսի 18-ից 19-ը պետական այցով կմեկնի Հյուսիսային Կորեա՝ այդ երկրի առաջնորդ Կիմ Չեն Ընի հրավերով: Այդ մասին այսօր հայտնել է Հյուսիսային Կորեայի պետական KRT հեռուստակայանը:
Կիմ Չեն Ընը Պուտինին հրավիրել է անցյալ սեպտեմբերին Ռուսաստանի Հեռավոր Արևելք կատարած այցի ժամանակ:
Պուտինը Փհենյանում չի եղել 2000 թվականի հուլիսից: Ուկրաինայում պատերազմ սկսելուց հետո Ռուսաստանն ամեն կերպ ընդգծում է Հյուսիսային Կորեայի հետ հարաբերությունների զարգացումը:
Վերլուծաբանների համոզմամբ, Մոսկվան Փհենյանից զինամթեր է գնում, մասնավորապես, տարբեր տրամաչափի հրետանային արկեր:
Հյուսիսային Կորեայից հետո Ռուսաստանի Դաշնության նախագահ Վլադիմիր Պուտինը հունիսի 19-ից 20-ը կայցելի Վիետնամ: