ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն ապրիլի 22-ին հանդիպել է ՄԱԿ-ի զարգացման ծրագրի մշտական ներկայացուցիչ Դմիտրի Մարիյասինի գլխավորած պատվիրակության հետ:
Հանձնաժողովի նախագահը բարձր է գնահատել ՄԱԿ-ի կողմից իրականացվող աջակցման ծրագրերը, որոնք մեծ դերակատարություն ունեն Հայաստանի զարգացման գործում:
Դմիտրի Մարիյասինն անդրադարձել է տարածաշրջանային համատեղ ծրագրերի իրականացմանը վերաբերող հարցերին և պատրաստակամություն հայտնել խորացնելու համագործակցությունը տարբեր ուղղություններով:
ՄԱԿ-ի զարգացման ծրագրերի համակարգողներ Դավիթ Հարությունյանը, Արտակ Ոսկանյանը և Արմեն Չիլինգարյանը ներկայացրել են «Մարդկային անվտանգության բարելավումը», «Աղետների ռիսկերի նվազեցում», «Մարդասիրական ականազերծում», «Քաղաքացիական պաշտպանություն» ծրագրերով իրականացված աշխատանքները: Ըստ մասնագետների՝ ուսումնասիրված ոլորտներում օրենսդրական լուրջ փոփոխությունների, կադրային վերապատրաստումների անհրաժեշտություն կա:
Կարևորելով ՄԱԿ-ի զարգացման ծրագրի օժանդակությամբ իրականացված աշխատանքները՝ Անդրանիկ Քոչարյանն ընդգծել է սեյսմիկ ռիսկերի գնահատման, ապահովագրության, արտակարգ իրավիճակներում նախօրոք իրազեկման համակարգի վերաթարմացման արդիական հարցերը:
Քննարկվել են նաև այն ոլորտային ուղղությունները, որոնցով նպատակահարմար է զարգացնել հետագա գործակցությունը: Այդ համատեքստում կարևորվել են փորձագիտական աջակցությանը, Ազգային ժողովի աշխատակազմի ինստիտուցիոնալ կարողությունների հզորացմանը, խորհրդարանական դիվանագիտությանը և պառլամենտարիզմի հետագա զարգացմանը միտված քայլերը:
![](https://azat.tv/wp-content/uploads/2022/09/azattvlogoblack.png)