Մարտի 20-ին էկրաններ բարձրացող «Պատրաստ ես, թե ոչ 2. Ահա և ես» ֆիլմը շարունակում է 2019 թվականի սարսափ-կատակերգության պատմությունը՝ այս անգամ գործողությունները տեղափոխելով ընտանեկան սահմաններից դուրս։ Գլխավոր հերոսուհի Գրեյս ՄակՔոլին՝ Սամարա Ուիվինգի մարմնավորմամբ, ստիպված է լինում պայքարել ոչ թե մեկ ընտանիքի, այլ մի ամբողջ գլոբալ կառույցի դեմ, որը ձգտում է վերահսկել աշխարհը։
Ֆիլմի նոր դերասանական կազմում են Էլայջա Վուդը և Սառա Միշել Գելարը։ Վուդը մարմնավորում է խորհրդավոր իրավաբանի, որը վերահսկում է մահացու խաղի կանոնները, իսկ Գելարը հանդես է գալիս Դանֆորթների ընտանիքի ղեկավարի դերում։ Ըստ սյուժեի՝ Գրեյսի հաղթանակը առաջին մասում ազատել է «Գերագույն աթոռի» տեղը, ինչի համար այժմ պայքարում են չորս հզոր ընտանիքներ։ Գելարը նշել է, որ ֆիլմը պահպանում է սկզբնական մասի լարվածությունը՝ միաժամանակ բարձրացնելով մրցակցության և դաժանության մակարդակը։
Ռեժիսորներ Մեթ Բեթինելի-Օլփինը և Թայլեր Ջիլեթը այս անգամ կենտրոնացել են գաղտնի հասարակության կանոնադրության և խաղի մեխանիզմների վրա՝ ստեղծելով ավելի լայնածավալ դավադրություն։ Գրեյսին միանում է նրա քույրը՝ Ֆեյթը (Քեթրին Նյուտոն), որի հետ հարաբերությունները դառնում են ֆիլմի հուզական առանցքը՝ մահացու վտանգների և անընդհատ լարվածության ֆոնին։