Պատգամավոր Արմեն Խաչատրյանը խորհրդարանում լրագրողների հետ ճեպազրույցում անդրադարձավ ՌԴ ԱԳ նախարար Լավորվի հայտարարությանը, որ Հայաստանում ռուսական դպրոցների թիվը պետք է ավելացվի։
«Ինչքան էլ ջանաք, որ որևէ հարցի մեջ ընդգծվի այն հանգամանքը, որ իշխանության ներկայացուցիչները նախկինում հակառուս էին և հիմա դարձել են ռուսամետ, նման բան չկա։ Կոնկրետ ես շատ կողմ եմ, որ ռուսական կրթությունը ՀՀ-ում զարգացում ապրի։ Այդ ուղղությամբ նաև մի շարք միջոցներ ենք ձեռնարկել։ Բայց նաև ասեմ, որ ՌԴ համապատասխան ներկայացուցիչների և դեսպանատան հետ քննարկումներում ես միշտ ասել եմ, որ նախ և առաջ պասիվությունն իրենցից է գալիս։ Օրինակ՝ Գորիսի թիվ 6 միջնակարգ դպրոցը, որը միշտ ռուսական թեքումով է եղել, չունի այսօր ռուսական ժամանակակից դասագրքեր։ Բազմաթիվ անգամ դիմում ենք, այդ հարցը ձգձգվում է։ ՀՀ իշխանությունը, կառավարությունը մշտապես պատրաստ է ռուսական լեզվի զարգացման, տարածման ուղղությամբ բոլոր միջոցառումներն իրականացնել։ Բայց նաև պետք է նախաձեռնի ռուսական կողմը։ Ի՞նչ պետք է անի, նախ ռուսական թեքումով դասագրքերի հարց պետք է լուծի, մշակութային օրերի միջոցառումները բավական ընդլայնի»,- ասաց նա։
Արմեն Խաչատրյանը շեշտեց, որ որևէ մեկը չի կարող ընդդիմանալ ռուսական լեզվի զարգացմանը, որովհետև եթե այսօր անձը չի տիրապետում ռուսերենին ու անգլերենին, գրագիտության բավարար մակարդակ չունեցող անձ է։
