ՀՀ ժողովրդական արտիստ, հայ անվանի դերասան, ռեժիսոր, սցենարիստ, Երևանի պատվավոր քաղաքացի Երվանդ Մանարյանը կյանքից հեռացավ 95 տարեկան հասակում։
Երվանդ Մանարյանը ծնվել է 1924 թվականին Արաքում։ Սովորել է տեղի Հայկազյան դպրոցում, ապա՝ Թեհրանի ամերիկյան և պարսկական քոլեջներում։ 1946 թվականին ներգաղթել է Հայաստան, սովորել Երևանի գեղարվեստա-թատերական ինստիտուտում, որի ռեժիսորական ֆակուլտետն ավարտել է 1952 թվականին։ Որպես դերասան և ռեժիսոր աշխատել է Երևանի Հ. Պարոնյանի անվան երաժշտական կոմեդիայի թատրոնում և Գ. Սունդուկյանի թատրոնում։ Նկարահանել է վավերագրական և գեղարվեստական մի շարք ֆիլմեր, ինչպես՝ «Հայկական մանրանկարչություն», «Միքայել Նալբանդյան», «Կառամատույցի կրպակը», «Լույս», «Դեղերի ծնունդը», «Նորից եկավ ամառը» և այլն։
Նրա ստեղծած հայտնի սցենարներից են «Տժվժիկ», «Տերն ու ծառան», «Սպիտակ ափեր»։ Մանարյանը նկարահանվել է մի շարք հայտնի ֆիլմերում, ինչպիսիք են՝ «Հարսնացուն Հյուսիսից», «Քաոս», «Մորգանի խնամին» և այլն:
Երվանդ Մանարյանը օրինակելի քաղաքացի էր, ով պայքարում էր մարդկանց ազատությունների, իրավունքների և պետության կայացման համար։
Azat TV մեդիանախաձեռնությունն իր ցավակցությունն է հայտնում Մանարյաններին և հայ ժողովրդին մեծ կորստի կապակցությամբ։
