Ավստրալիայում ուժի մեջ է մտնում մինչև 16 տարեկանների համար սոցիալական մեդիայի արգելքը՝ նպատակ ունենալով պաշտպանել երեխաներին առցանց ռիսկերից։ Այս նոր իրավիճակում Snapchat-ը ներկայացրել է տարիքային ստուգման նոր մեխանիզմներ՝ համագործակցելով կ-ID ընկերության հետ։ Օգտվողները կարող են հաստատել իրենց տարիքը բանկային հաստատման, պետական փաստաթղթի սկանավորման կամ դեմքի ճանաչման միջոցով։ Ընկերությունը վստահեցնում է, որ ստուգման համար փոխանցված բոլոր պատկերները անմիջապես ջնջվում են։ Սակայն մասնագետները զգուշացնում են, որ տվյալների կարճաժամկետ փոխանցումն անգամ ռիսկեր է պարունակում՝ հատկապես, եթե համակարգերը պատշաճորեն չեն գործում կամ խոցելի են։ Բացի այդ, դեմքի ճանաչման մեթոդի ճշգրտությունը նույնպես հարցականի տակ է դրվում։
Միևնույն ժամանակ, ԱՄՆ-ում բացահայտված քրեական դեպքը ցույց է տալիս, որ նույնիսկ խիստ սահմանափակումների դեպքում Snapchat-ը շարունակում է օգտագործվել անչափահասների նկատմամբ սեռական հանցագործությունների համար։ Սա ընդգծում է, որ տեխնիկական լուծումները չեն կարող լիովին վերացնել առցանց սպառնալիքները։ Երեխաների անվտանգությունը պահանջում է ոչ միայն տեխնոլոգիական բարեփոխումներ, այլև համընդհանուր պատասխանատվություն՝ հարթակների, պետական մարմինների, ծնողների և հենց երեխաների կողմից։