Վարչապետ Նիկոլ Փաշինյանը Բեռլինում Արտաքին հարաբերությունների գերմանական ընկերակցությունում ունեցած ելույթի ընթացքում հայտարարել է «TRIPP Company»-ի գրանցման մասին։ Այս հայ-ամերիկյան համատեղ ձեռնարկությունը կստանա տարածաշրջանում ենթակառուցվածքների զարգացման իրավունք՝ ներառյալ երկաթուղային, ճանապարհային, նավթային և գազային խողովակաշարերը, ինչպես նաև օպտիկամանրաթելային մալուխները։
Նախագծի իրականացումը նախատեսվում է սկսել արդեն հաջորդ տարի՝ անցնելով շինարարության փուլին։ «TRIPP ուղի» նախագիծը համահունչ է Կառավարության «Խաղաղության խաչմերուկ» նախաձեռնությանը՝ նպաստելով տարածաշրջանում լրացուցիչ կապերի և փոխկախվածությունների ստեղծմանը։ Փաշինյանը նշել է, որ այս նախագիծը, ինչպես նաև Հայաստանի և Թուրքիայի միջև հաղորդակցության բացումը, կարող են դառնալ Միջին միջանցքի կարևոր բաղադրիչ՝ ապահովելով Եվրոպայի, Հարավային Կովկասի և Կենտրոնական Ասիայի միջև անխոչընդոտ կապ։