ԱՄՆ նախագահ Դոնալդ Թրամփը թուրք պաշտոնակից Ռեջեփ Էրդողանի հետ հեռախոսազրույցից հետո դրական է խոսել Վաշինգտոնի և Անկարայի միջև տնտեսական համագործակցության հեռանկարների մասին:
«Քննարկել ենք ԱՄՆ-ի և Թուրքիայի տնտեսական հարաբերությունները, կա հրաշալի հեռանկար շոշափելի զարգացման համար», – Թվիթերում գրել է Սպիտակ տան ղեկավարը, ով այդ հեռախոսազրույցից մեկ օր առաջ սպառնում էր «տնտեսապես կործանել Թուրքիան սիրիացի քրդերի դեմ հարձակման դեպքում»:
Ի պատասխան՝ Թուրքիայի նախագահի խոսնակ Իբրահիմ Քալընը հայտարարել է, որ Անկարան շարունակելու է իր պայքարը ԱՄՆ-ի աջակցությունը վայելող քրդերի դեմ, քանի որ թուրքական իշխանությունները տարբերություն չեն տեսնում Սիրիայի հյուսիսի քրդական խմբավորումների և ջիհադիստների միջև:
Հունվարի սկզբին Սպիտակ տան ազգային անվտանգության հարցերով խորհրդական Ջոն Բոլթոնը Սիրիայից ամերիկյան զորքը դուրս բերելու նախապայման է համարել քրդերի անվտանգության երաշխիքը:
Հաղորդում է armtimes.com-ը։
