Հայաստանի կառավարությունը հաստատել է 2023 թվականի դեկտեմբերի 21-ի N 2291-Լ որոշման փոփոխությունները, որոնք նախատեսում են Լեռնային Ղարաբաղից բռնի տեղահանված ընտանիքների առաջին կուրս ընդունված ուսանողների ուսման վարձի փոխհատուցում 2025-2026 ուսումնական տարում: Այս որոշման շրջանակում պետական բուհերի բակալավրիատի վճարովի համակարգում ընդգրկված շուրջ 240 ուսանող և արհեստագործական ու միջին մասնագիտական ուսումնական հաստատությունների 75 ուսանող կստանան փոխհատուցում:
Փոխհատուցումը կտրամադրվի ուսանողների առաջադիմության հիման վրա: Բուհերի ուսանողները կստանան փոխհատուցում մինչև իրենց կրթական մակարդակի ավարտը՝ պայմանով, որ կիսամյակային միջին որակավորման գնահատականը կլինի 75% և ավելի: Արհեստագործական ու միջին մասնագիտական ուսումնական հաստատությունների ուսանողները պետք է ունենան նախորդ կիսամյակի ընթացքում 50%-ից ոչ պակաս «գերազանց» և «լավ» գնահատականներ:
Ընդհանուր առմամբ, 2025-2026 ուսումնական տարում նախատեսվում է փոխհատուցում տրամադրել շուրջ 870 ուսանողի, ովքեր բավարարում են առաջադիմության շեմերը: Նախկինում այս ծրագրի շրջանակում փոխհատուցում են ստացել մինչև 2023 թվականի սեպտեմբերի 19-ը հայաստանյան բուհերում ընդգրկված ուսանողները, ինչպես նաև 2024-2025 ուսումնական տարում ընդունվածները: