ՄԱԿ-ի Անվտանգության խորհուրդը մարտի 11-ին ընդունեց բանաձև, որով պահանջում է Իրանից անհապաղ դադարեցնել հարձակումները Պարսից ծոցի հարևան պետությունների՝ Բահրեյնի, Քուվեյթի, Օմանի, Կատարի, Սաուդյան Արաբիայի, Արաբական Միացյալ Էմիրությունների և Հորդանանի դեմ։ Փաստաթուղթը դատապարտում է Թեհրանի գործողությունները, որոնք խախտում են միջազգային իրավունքը և վտանգ են ներկայացնում տարածաշրջանային և համաշխարհային անվտանգության համար։ Սակայն բանաձևում չեն նշվում Միացյալ Նահանգների և Իսրայելի ռազմական գործողությունները Իրանի դեմ։
Ռուսաստանը և Չինաստանը ձեռնպահ են մնացել քվեարկությունից՝ փաստաթուղթը միակողմանի և կողմնակալ որակելով։ Ռուսաստանի ներկայացուցիչ Վասիլի Նեբենզյանը նշել է, որ առաջարկել են նաև Իրանի դեմ հարվածները դատապարտող դրույթներ, սակայն ԱՄՆ-ը վետո է դրել։ Իրանը քննադատել է բանաձևը՝ այն համարելով ՄԱԿ-ի մանդատի չարաշահում և պնդելով, որ իր հարձակումները ուղղված են ամերիկյան ռազմական օբյեկտներին։
Իտալիայի վարչապետ Ջորջիա Մելոնին ընդգծել է, որ Իրանի դեմ ԱՄՆ-ի և Իսրայելի գործողությունները խախտում են միջազգային իրավունքը և կոչ է արել միջազգային հանրությանը թույլ չտալ, որ Իրանը միջուկային զենք ունենա։ Նա նաև հայտարարել է, որ Իտալիան չի պատրաստվում ներգրավվել այս հակամարտությունում։