Նոյեմբերի 15-ին Հնդկաստանի Ռամոջի Ֆիլմ Սիթիում տեղի ունեցավ «Վարանասի» ֆիլմի պաշտոնական ներկայացումը՝ Ս.Ս. Ռաջամուլիի ղեկավարությամբ։ Միջոցառմանը մասնակցեցին շուրջ 50 հազար մարդ՝ հանդիսատես, լրատվամիջոցներ և կինոարդյունաբերության ներկայացուցիչներ։ Ֆիլմում գլխավոր դերերում հանդես են գալիս Մահեշ Բաբուն (Ռուդրա), Փրիյանկա Չոպրան (Մանդակինի) և Պրիթվիրաժ Սուկումարան (Կումբհա), իսկ երաժշտության հեղինակը Օսկարակիր ՄՄ Քերավանին է։ Ֆիլմի գաղափարը միավորում է հնդկական դարավոր առասպելաբանությունն ու ժամանակակից արկածային ժանրերը՝ ստեղծելով եզակի կինեմատոգրաֆիկ լեզու։
Ֆիլմի թրեյլերը հանդիսատեսին տեղափոխում է 512 թվական, Վարանասիի հին թագավորություն, այնուհետև՝ ապագա, որտեղ աստղաքարեր են ընկնում տարբեր մայրցամաքներում։ Տեսաշարերում առանձնանում են Ռուդրայի կերպարը՝ ցուլին նստած և եռաշյուղը ձեռքին, ինչպես նաև Մանդակինիի խորհրդավոր դերը։ Ֆիլմը երկու երեքժամյա մասից է բաղկացած, ինչը նորություն է հնդկական կինոարտադրության համար։
«Վարանասին» նախատեսվում է ցուցադրել IMAX ձևաչափով 2027 թ․ ամռանը՝ համաշխարհային պրեմիերայով։ Ֆիլմի ստեղծման բյուջեն կազմում է շուրջ 135 միլիոն դոլար, ինչը վկայում է նախագծի մասշտաբային և միջազգային հավակնությունների մասին։ Ս.Ս. Ռաջամուլին իր փորձով ու թիմով պատրաստ է սահմանել նոր չափանիշներ ինչպես հնդկական, այնպես էլ համաշխարհային կինոյի համար։