Գազայի 1.5 միլիոն տեղահանված բնակիչների համար Բայրոն փոթորիկը դարձել է հերթական փորձությունը գոյատևման համար։ Երկամյա պատերազմի հետևանքով ավերված բնակավայրերում մարդիկ ապրում են հիմնականում պլաստիկ թաղանթների և ժամանակավոր վրանների տակ։ Այս փխրուն կացարանները չեն դիմանում ջրհեղեղին ու քամիներին, ինչի հետևանքով շատ ընտանիքներ ստիպված են գիշերել դրսում կամ ցեխոտված վրաններում։
Ալ Ջազիրայի փոխանցմամբ՝ վերջին մեկ օրվա ընթացքում փոթորկի հետևանքով զոհվել է առնվազն 14 մարդ, այդ թվում՝ երեք երեխա, որոնք մահացել են ցրտահարությունից։ Շատ վրաններ և պատեր փլուզվել են, իսկ ընտանիքները հնարավորություն չունեն նույնիսկ նվազագույն միջոցներով ապահովելու իրենց անվտանգությունը։ Հումանիտար օգնությունն անկանոն է, սննդի ու ջրի պաշարները՝ սուղ։
Այս իրավիճակում Գազայի բնակիչների գլխավոր հենարանը մնում է փոխօգնությունը․ հարևանները կիսում են ունեցածը, երիտասարդները փորձում են ամրացնել վրանները, իսկ կանայք կազմակերպում են համատեղ ճաշ պատրաստում։ Սակայն փոթորիկը հստակ ցույց տվեց՝ Գազայի ճգնաժամը խորանում է, իսկ բնակչությունը պայքարում է ոչ միայն պատերազմի, այլև բնության անողոք ուժերի դեմ՝ հաճախ միայն համբերությամբ և հույսով։