Նստաշրջանի ավարտից հետո ես կարող եմ ընդդիմադիր պատգամավորների բացակաների հարցը դիտարկել, քննարկել ԱԺ խորհրդի նիստում և դրանից հետո գործընթաց սկսել:
Այս մասին այսօր Factor TV-ի հետ զրույցում ասել է ԱԺ նախագահ Ալեն Սիմոնյանը:
Վերջինս հավելել է, որ կան պատգամավորներ, որոնք արդեն անցել են բացակայությունների թույլատրելի շեմը:
«Պետք է քննարկենք և հասկանանք՝ կարո՞ղ ենք այս բացակաները հարգելի համարել, թե՞ ոչ: Դրանից հետո որոշում կկայացվի: Վստահ եմ՝ կգնանք օրենքի ճանապարհով»,- վստահեցրել է Սիմոնյանը:
Նա նաև նկատել է՝ իրենք օրենքին վերաբերող հարցերում քաղաքական որոշումներ չեն կայացնում:
«Օրենքն ասում է՝ յուրաքանչյուր խմբակցություն կարող է բոյկոտել մեկ անգամ: Կներեք, բայց Ազգային ժողովը «проходной двор» չէ, որ երբ ուզես մտնես ու դուրս գաս, նիստերին չգան ու հետո ասեն՝ սա է իմ քաղաքական գործունեությունը»,- հավելել է ՀՀ Ազգային ժողովի նախագահը:
Հարցադրմանը՝ կարծում է՝ ընդդիմադիր պատգամավորները պետք է մանդատից զրկվե՞ն, Սիմոնյանն ընդգծել է, որ խիստ է մտադրված. «Բայց չեմ ցանկանում իմ կարծիքով հիմա կանխորոշում անել: Սակայն ես խիստ եմ տրամադրված»:
ԽՈՐՀՈւՐԴ Է ՏՐՎՈւՄ ԿԱՐԴԱԼ
