Սիրիայի հյուսիսում, հատկապես Հալեպ քաղաքում, իրավիճակը կրկին լարված է: Կառավարական ուժերի և քրդական «Սիրիայի դեմոկրատական ուժերի» միջև տեղի ունեցող բախումները հանգեցրել են զոհերի և վիրավորների: Հրաձգության հետևանքով զոհվել է առնվազն չորս մարդ, իսկ վիրավորների թվում են երեխաներ: Բախումները հատկապես կատաղի են եղել Աշրաֆիա և Շեյխ Մաքսուդ թաղամասերում, որտեղ բնակվում են մեծ թվով քրդեր։
Հալեպի նահանգապետարանը, նկատի ունենալով անվտանգության վատթարացումը, հայտարարել է դպրոցների, համալսարանների և պետական հաստատությունների փակման մասին: Փակ է նաև Հալեպի օդանավակայանը թռիչքների համար։ Քրդական ուժերը պնդում են, որ նրանք պատասխանատու չեն հրետակոծությունների համար՝ մեղադրելով կառավարական ուժերին քրդական թաղամասերի ռմբակոծման համար:
Այս իրավիճակը տեղի է ունեցել Դամասկոսում բանակցություններից ընդամենը երկու օր անց, որտեղ քննարկվել է քրդական ուժերի հնարավոր ներառումը սիրիական բանակում: Սակայն բանակցությունները կրկին փակուղի են մտել, և զարգացումները հանգեցրել են զինված բախումների։