Հունիսի 24-ին Միացյալ Նահանգների կողմից Իրանի ղեկավարության նկատմամբ սահմանած պատժամիջոցներն անօգուտ են և ընդմիշտ փակում են դիվանագիտության ճանապարհը: Թվիթերյան իր էջում գրել է Իրանի ԱԳՆ պաշտոնական ներկայացուցիչ Աբաս Մուսավին։
«Անօգուտ պատժամիջոցների սահմանումը՝ ընդդեմ Իրանի գերագույն առաջնորդի, ինչպես նաև իրանական դիվանագիտության ղեկավարի, ընդմիշտ փակում են դիվանագիտության ճանապարհը»,- նշել է նա:
Մուսավին նաև նշել է, որ «ԱՄՆ նախագահ Դոնալդ Թրամփի հուսահատված կառավարությունը ոչնչացնում է բոլոր միջազգային մեխանիզմները, որ կոչված են պահպանելու մոլորակում խաղաղությունն ու կայունությունը»:
ԱՄՆ նախագահը երկուշաբթի հրաման էր ստորագրել, որով նախատեսվում էր Իրանի դեմ պատժամիջոցների խստացում: Լրագրողների առջև ելույթ ունենալով՝ նա հստակեցրել էր, որ նոր միակողմանի միջոցներն ուղղված են առաջին հերթին Իրանի ղեկավար և հոգևոր առաջնորդ այաթոլլահ Ալի Խամենեիի դեմ: ԱՄՆ ֆինանսների նախարար Սթիվեն Մնուչինն իր հերթին հետո հայտնել էր, որ «ամենաուշը ընթացիկ շաբաթվա ընթացքում» նախատեսվում է պատժամիջոցային ցուցակի մեջ մտցնել նաև Իրանի ԱԳ նախարար Ջավադ Զարիֆին: Պատժամիջոցներ կսահմանվեն նաև Իսլամական հեղափոխության պահպանների կորպուսի 8 զորահրամանատարների դեմ, ներառյալ գեներալի, որը պատասխանատու է հունիսի 20-ին ամերիկյան հետախուզական անօդաչու թռչող սարքի ոչնչացման համար:
Իրանի շուրջ իրավիճակը սրվել է այն բանից հետո, երբ հունիսի 13-ին Օմանի ծոցում երկու լցանավերի վրա ենթադրյալ հարձակումից հետո տեղի էին ունեցել պայթյուններ և հրդեհ: ԱՄՆ-ն միջադեպի պատասխանատու էր համարել Իրանին, նրան աջակցել էին Մեծ Բրիտանիան և Սաուդյան Արաբիան, իսկ Իրանի ԱԳՆ-ն այդ մեղադրանքները հերքել էր:
Հունիսի 20-ին Իրանի ԶՈՒ-ն խփել էր ԱՄՆ ՌԾՈՒ RQ-4 հետախուզական անօդաչու թռչող սարքը, որից հետո ԱՄՆ-ն, ըստ նախագահ Դոնալդ Թրամփի հայտարարության, ռազմական գործողություն էր պատրաստել, որով նախատեսվում էր Իրանի տարածքում 3 օբյեկտների վրա կետային հարված հասցնել: Այս գործողությունը սկսելուց 10 րոպե առաջ Թրամփը հրամայել էր այն չանցկացնել՝ համարելով Թեհրանի գործողություններին ոչ համաչափ:
