Մեն կղզում շարունակվում է FIDE Chess.com Grand Swiss 2019 շախմատային մրցաշարը, որին մասնակցում է նաև հայկական շախմատի առաջատար Լևոն Արոնյանը։
Երեկ կայացան մրցաշարի 8-րդ տուրի պարտիաները։ Արոնյանի մրցակիցը Ֆաբիանո Կարուանան էր, ում հետ միասին հայ գրոսմայստերը կիսում էր առաջին հորիզոնականը։ Պարտիան ընդացավ հավասար պայքարում ու կողմերը 38-րդ քայլում համաձայնվեցին ոչ-ոքի։
Առաջատարների այս արդյունքից օգտվեց միայն Իսպանիան ներկայացնող Դավիդ Անտոնը, ով ընդամենը կես միավոր էր հետ մնում Արոնյանին ու Կարուանայից, և Գրիշչուկի նկատմամբ տարած հաղթանակից հետո կարողացավ միանալ առաջատարներին՝ վաստակած 6 միավորով։
Այսօր կայանալու է մրցաշարի 9-րդ տուրը։ Արոնյանը սպիտակներով կմրցի Դավիդ Անտոնի հետ, իսկ Կարուանան սևերով ուժերը կչափի աշխարհի գործող չեմպիոն Մագնուս Կարլսենի հետ, ով այս պահին իր ակտիվում ունի 5,5 միավոր։
Նյութի հեղինակ՝ Հարություն Ստեփանյան։