Այսօր՝ դեկտեմբերի 4-ին, ԱԱԾ-ն ձերբակալեց Արշակ արքեպիսկոպոս Խաչատրյանին։ Ձերբակալությունը տեղի ունեցավ Քննչական կոմիտեի շենքում: Այս մասին տեղեկացրել է նրա փաստաբան Արսեն Բաբայանը: Ձերբակալությունը տեղի է ունեցել մի շարք սկանդալային իրադարձություններից հետո, որոնք կապված էին «Հայկական Վիկիլիկս» տելեգրամյան ալիքի հրապարակումների հետ: Հոկտեմբերի 25-ին ալիքը հրապարակել էր ինտիմ բնույթի տեսագրություններ, որոնք վերագրվում էին Արշակ սրբազանին: Վերջինս հերքել էր այդ մեղադրանքները՝ դրանք անվանելով զրպարտություն և հորինվածք:
Արշակ սրբազանը, նախքան իր ձերբակալությունը, հայտարարել էր, որ իր նկատմամբ իրականացվող հետապնդումները պայմանավորված են իշխանությունների նկատմամբ ունեցած իր դիրքորոշումներով: Նա նշել էր, որ իշխանությունները փորձում են ունենալ կառավարելի հոգևորականներ, որոնք չեն հակադրվի նրանց քաղաքականությանը: Սրբազանը նաև հայտնել էր, որ ԱԱԾ-ի հետ մի քանի հանդիպումներ է ունեցել, որոնց ընթացքում ակնարկներ են եղել որոշակի գործողություններ իրականացնելու մասին:
Վերջին ամիսներին Հայ Առաքելական Եկեղեցու շուրջ ծավալվող իրադարձությունները մեծ արձագանք են ստացել հանրության շրջանում: Արշակ սրբազանի ձերբակալությունը դիտարկվում է որպես քաղաքական ճնշման դրսևորում: Գործող իշխանությունները գիտակցված կերպով կիսաճշմարտություններ տարածելով՝ հանրությանը փորձում են համոզել, որ հոգևոր առաջնորդները չարիք են ու ծառայում են օտար շահերին։ Դրա հետևանքով հանրային պառակտումներն արդեն վտանգում են Հայաստանի ներքաղաքական կայունությանը։