Տիգրան Արզաքանցյանը չի մասնակցի ընտրություններին. Դատարանն ուժի մեջ է թողել ԿԸՀ որոշումը

Հայաստանի դեմոկրատական կուսակցության նախագահ, կուսակցության վարչապետի թեկնածու Տիգրան Արզաքանցյանն ընտրություններին չի մասնակցի։ ՀՀ վարչական դատարանը՝ դատավոր Գրիգոր Առաքելյանի նախագահությամբ, կազմով՝ դատավորներ Էդվարդ Նահապետյանի, Արթուր Ավագյանի, Արծրուն Միրզոյանի, Մերի Համբարձումյանի, մերժել է Տիգրան Արզաքանցյանի հայցադիմումն՝ ընդդեմ ՀՀ կենտրոնական ընտրական հանձնաժողովի։

Հիշեցնենք, որ հունիսի 10-ին ԿԸՀ-ն անվավեր է ճանաչել Տիգրան Արզաքանցյանի գրանցումը՝ ներկայացված փաստաթղթերում ներկայացված անճշտությունների պատճառով։

Արզաքանցյանը հայցադիմում է ներկայացրել Վարչական դատարան՝ պահանջելով անվավեր ճանաչել ԿԸՀ 10.06.21թ. թիվ 133-Ա որոշումը՝ իր գրանցումն անվավեր ճանաչելու մասին։

Դատաքննության ընթացքում Վարչական դատարանը պահանջել է ԿԸՀ որոշման համար հիմք հանդիսացած վարույթի նյութերը, որոնք ևս ուսումնասիրվել են։ Ելնելով կողմերի ներկայացրած դիրքորոշումներից և առարկություններից, ինչպես նաև՝ դատարան ներկայացված նյութերից, Դատարանը գտել է, որ ներկայացված հայցադիմումն անհիմն է և ենթակա է մերժման։