Դեկտեմբերի 10-ից Ավստրալիայում ուժի մեջ է մտել նոր օրենք, որը արգելում է 16-ից ցածր տարիքի երեխաներին օգտվել սոցիալական մեդիայի հիմնական հարթակներից։ Այս քայլը, որն առաջինն է աշխարհում իր մասշտաբով, նպատակ ունի պաշտպանել երեխաներին ցանցային բռնություններից, վնասակար բովանդակությունից և հոգեբանական ճնշումներից։ Օրենքի համաձայն՝ Facebook, Instagram, TikTok, Snapchat, YouTube և այլ հայտնի հարթակներ պարտավոր են արգելափակել մինչև 16 տարեկան օգտատերերին և կանխել նոր հաշիվների ստեղծումը նրանց համար։ Ընկերությունները, որոնք չեն համապատասխանում նոր պահանջներին, կարող են ենթարկվել խոշոր տուգանքների։
Չնայած լայն աջակցությանը՝ արգելքը բախվել է բազմաթիվ քննադատությունների։ Շատերը նշում են, որ դեռահասները հեշտությամբ շրջանցում են սահմանափակումները՝ օգտագործելով VPN կամ կեղծ տվյալներ, իսկ որոշ ծնողներ նույնիսկ օգնում են երեխաներին այդ հարցում։ Ոմանք մտահոգված են, որ այս արգելքը կարող է մեկուսացնել այն երեխաներին, ովքեր սոցիալական մեդիան օգտագործում էին աջակցության, կրթության կամ ստեղծագործական ինքնադրսևորման համար։ Մասնագետները նաև նշում են՝ սոցիալական մեդիայի օգտագործումը չի կարող ամբողջությամբ բացատրել երեխաների հոգեկան առողջության խնդիրները, իսկ արգելքի արդյունավետությունը կախված է բազմաթիվ գործոններից։
Ավստրալիայի օրինակը հետաքրքրությամբ են ուսումնասիրում այլ երկրներ՝ փորձելով հասկանալ, թե արդյոք նման արմատական մոտեցումները կարող են գործնականում ապահովել երեխաների անվտանգությունը՝ առանց նրանց մեկուսացնելու կամ խախտելու նրանց անձնական տվյալների պաշտպանությունը։