Ավիացիոն ճգնաժամ. ԵՄ-ն զգուշացնում է վառելիքի պակասի մասին

Եվրոպական օդանավակայանների միջազգային խորհուրդը (ACI Europe) զգուշացրել է, որ եթե Հորմուզի նեղուցը չբացվի առաջիկա երեք շաբաթվա ընթացքում, Եվրոպան կարող է բախվել ավիավառելիքի լուրջ պակասի։ Նեղուցը համարվում է եվրոպական շուկայի համար վառելիքի մատակարարման հիմնական ուղիներից մեկը, որն ապահովում է ներմուծման մոտ 50%-ը։ Ավիավառելիքի գները հասել են ռեկորդային 1838 դոլարի՝ մեկ տոննայի դիմաց, ինչը ստիպում է ավիաընկերություններին կրճատել չվերթները։

Հոնկոնգյան «Cathay Pacific»-ն արդեն հայտարարել է մայիսի կեսերից հունիսի վերջ ընկած ժամանակահատվածում չվերթների 2%-ը չեղարկելու մասին, իսկ նրա բյուջետային դուստր ձեռնարկությունը՝ «HK Express»-ը, կկրճատի չվերթների 6%-ը։ Ավիաընկերությունները նշում են, որ սա վերջին միջոցն է՝ ծախսերի կտրուկ աճը մեղմելու համար։ Մասնագետները նախազգուշացնում են, որ իրավիճակը սպառնում է Եվրոպայի տնտեսական կայունությանը, քանի որ ավիացիոն ոլորտն ապահովում է միլիոնավոր աշխատատեղեր և հսկայական մասնաբաժին ՀՆԱ-ում։