Հունիսի 18-ին Կուբայի Ազգային ժողովը միաձայն հաստատել է տնտեսական բարեփոխումների լայնածավալ փաթեթ, որը ներառում է ավելի քան 175 կետ։ Reuters-ի փոխանցմամբ՝ այս քայլը 1959 թվականի հեղափոխությունից ի վեր ամենամեծ փոփոխությունն է երկրի սոցիալիստական մոդելում, որը նպատակ ունի դիմակայելու ամենախորը տնտեսական ճգնաժամին։
Նոր օրենսդրությունը թույլ է տալիս մասնավորեցնել պետական ձեռնարկությունները՝ դրանք վերածելով մասնավոր առևտրային կառույցների։ Բարեփոխումները նաև կանաչ լույս են վառում մասնավոր անշարժ գույքի զարգացման և ֆինանսական հատվածում մասնավոր բանկերի գործունեության համար։ Կարևորագույն փոփոխություններից է պետական գույքի վաճառքի թույլտվությունը ինչպես տեղացի, այնպես էլ օտարերկրյա իրավաբանական և ֆիզիկական անձանց, այդ թվում՝ արտերկրում բնակվող կուբացիների համար։
Վարչապետ Մանուել Մարերոն, ներկայացնելով ծրագիրը, շուկան բնորոշել է որպես «ռեսուրսների արդյունավետ բաշխման գործիք»։ Չնայած այս գաղափարական շրջադարձին՝ նախագահ Միգել Դիաս-Կանելը վստահեցրել է, որ Կուբան չի հրաժարվում սոցիալիզմից։ Նա ընդգծել է, որ այս քայլերը պայմանավորված են երկրի առջև ծառացած տնտեսական շրջափակմամբ և քաղաքացիների կենսամակարդակը բարելավելու անհրաժեշտությամբ։
Բարեփոխումներին աջակցել են Կոմունիստական կուսակցությունը և նախկին առաջնորդ Ռաուլ Կաստրոն։ Ներկայումս Կուբան գտնվում է ծանր վիճակում՝ էներգետիկ ճգնաժամի և տրանսպորտային համակարգի գրեթե լիակատար կաթվածահար վիճակի պատճառով, ինչը ստիպել է իշխանություններին դիմել շուկայական այս արտակարգ մեխանիզմներին։