31-ամյա Նովակ Ջոկովիչն Ավստրալիայի բաց առաջնությունում առանց մեծ դժվարության հաղթեց իսպանացի Ռաֆայել Նադալին: Երեկ՝ հունվարի 27-ին, ATP վարկանիշային աղյուսակը գլխավորող սերբը ոչ մի շանս չթողեց աղյուսակի 2-րդ հորիզոնականը զբաղեցնող 32-ամյա Նադալին, որը մինչև այդ մրցաշարում ոչ մի սեթ չէր պարտվել: 2 ժամ 4 րոպե տևած հանդիպումն ավարտվեց 6-3 6-2 6-3 հաշվով:
Այդ ընթացքում Ջոկովիչը 8 էյս է կատարել, ոչ մի կրկնակի սխալ թույլ չի տվել և օգտագործել է 5 բրեյք փոինթ: Այս 2 թենիսիստների համար սա 53-րդ հանդիպումն էր միմյանց դեմ: Դրանցում Ջոյովիչը հաղթել է 28, Նադալը՝ 25 անգամ:
Ջոկովիչը կարիերայում 7-րդ անգամ հաղթող դարձավ Ավստրալիայի բաց առաջնությունում: Բացի այդ՝ ռեկորդ սահմանեց՝ տղամարդկանց պայքարում դառնալով առաջինը, ով 3 անընդմեջ հաղթանակն է տանում Մեծ սաղավարտի իրար հաջորդող մրցաշարերում:
Ընդհանուր առմամբ սա նրա 15-րդ տիտղոսն է Մեծ սաղավարտի մրցաշարերում: Սերբը 1 անգամ էլ հաղթել է «Ռոլան Գարոսում», 4 անգամ՝ «Ուիմբլդոնում», 3 անգամ՝ ԱՄՆ բաց առաջնությունում:
Նախօրեին տեղի էր ունեցել կանանց եզրափակիչը: Ճապոնացի Նաոմի Օսական հաղթել էր չեխ Պետրա Կվիտովային (7-6 5-7 6-4)։
Հաղորդում է armtimes.com-ը։