ԵԱՀԿ գործող նախագահ և Շվեդիայի ԱԳ նախարար Անն Լինդեն ողջունել է 15 հայ ռազմագերիների վերադարձը Հայաստան և հույս հայտնել հակամարտության հետագա կայուն կարգավորման:
«Ողջունում եմ ևս 15 հայ անձանց ազատ արձակումն Ադրբեջանի կողմից և ականապատման քարտեզների տրամադրումը Հայաստանի կողմից»,- իր թվիթերյան էջում գրել է Լինդեն:
Նա բարձր է գնահատել նաև ռուսական միջնորդությունը՝ նշելով, «Հուսով եմ, որ վստահության մթնոլորտի հետագա կառուցումը ճանապարհ կհարթի կայուն կարգավորման համար՝ ԵԱՀԿ Մինսկի խմբի համանախագահների հովանու ներքո»,- հավելել է գործիչը:
Ավելի վաղ հայտնել էինք, որ Հայաստան են վերադարձել Ադրբեջանի կողմից գերեվարված 15 հայ գերիներ։ Նրանք «Էրեբունի» օդանավակայան ժամանելուց հետո անմիջապես տեղափոխվել են բուժզննման: