www.azat.tv մեդիանախաձեռնությունը հետաքրքրված է Հայաստանում էլեկտրոնային առևտրի մասին լուսաբանմամբ։ Այդ կապակցությամբ ցանկանում ենք իրականացնել հարցազրույցներ էլեկտրոնային առևտրով զբաղվող կազմակերպությունների հետ և ներկայացնել նրանց գործունեությունը։ Այս անգամ ցանկանում ենք անդրադառնալ Full.am կայքին։
Առաջինը՝ կցանկանայի՝ ներկայանաք և պատմեք Full.am գաղափարի մասին. ինչպե՞ս հղացավ կայքը ստեղծելու միտքը, ո՞րն է ձեր առաքելությունը և ինչքանո՞վ եք բաց ու հրապարակային գործում։
Ես՝ Վարդան Դավթյանս, հանդիսանում եմ Full.am կայքի համահիմնադիր։ Ինչ վերաբերում է այս կայքի ստեղծման գաղափարին, ապա ամեն ինչ սկսվեց հետևյալից։ Ես ցանկանում էի փոխանակել ավտոմեքենաս իմ կողմից նախընտրած այլ ավտոմեքենայի հետ և չկարողացա գտնել մի հարթակ, որի օգնությամբ կկարողանայի իրականացնել գործարքը։ Այդ պահից սկսած՝ ես սկսեցի գեներացնել մի գաղափար, որը հնարավոր կդարձնի իրականացնել թե՛ իմ գործարքը, թե՛ կօգնի այլ մարդկանց իրականացնել նմանատիպ գործարքներ։ Սկզբում մենք մտադիր էինք զբաղվել բացառապես ավտոմեքենաների առք ու վաճառքի համար հարթակ ստեղծելով, սակայն հետզհետե զարգացնելով գաղափարը՝ որոշում կայացրեցինք ներառել ամենատարբեր ոլորտները և ստեղծեցինք հայտարարությունների կայք՝ ընտրելով Full.am անվանումը, քանի որ անգլերեն լեզվից թարգմանաբար full բառը նշանակում է ամբողջ։ Ահա սա է մեր գործնական փիլիսոփայությունը։ Փաստորեն, Full.am կայքն իր բոլոր հնարավորություններին զուգահեռ թույլ է տալիս մեր օգտատերերին իրականացնել ավտոմեքենայի «Փոխանակում»՝ մուտքագրելով իրենց կողմից նախընտրած ավտոմեքենայի տվյալները դեռ հայտարարությունը տեղադրելիս։
Ի՞նչ հավելյալ ծառայություններ եք առաջարկում, բացի հիմնականից։ Ե՞րբ սպասենք նոր ծառայությունների առաջարկի։
Ինչ վերաբերում է այս հարցադրմանը, ապա պետք է նշեմ, որ Full.am կայքում բոլոր ցանկացողները կարող են տեղադրել հայտարարություններ, որոնք վերաբերում են ամենտարբեր ոլորտներին։ Քանի որ ժամանակակից աշխարհը շատ արագ է փոփոխվում, նշեմ, որ յուրաքանչյուր պահ կարող են հասանելի դառնալ ամենաանսպասելի ծառայությունները։ Իսկ ինքը՝ կայքը, սպասարկվում է շուրջօրյա և նորամուծություններ, որոնք կարող են լինել անտեսանելի մեր օգտատերերի համար, սակայն հույժ կարևոր, լինում են գրեթե ամեն շաբաթ։
Ովքե՞ր են Ձեր օգտատերերը և հիմնական մրցակիցները։
Մեր օգտատերերն են տարբեր գործունեության ոլորտ ներկայացնող ՀՀ և օտարերկրյա քաղաքացիները։ Ինչ վերաբերում է այս հարցի երկրորդ մասին՝ հիմնական մրցակիցներին, ապա նշեմ, որ Խորհրդային Միության անկումից հետո, երբ տեղի ունեցավ անցում պլանային տնտեսությունից դեպի շուկայական հարաբերություններ, ապա տվյալ ոլորտը ներկայացնող յուրաքանչյուր հարթակ արդեն ինքնին հանդիսանում է մրցակից։
Կարո՞ղ եք ասել, թե ինչքան է Ձեր տարեկան շրջանառությունը, և քանի՞ օգտատեր ունի Full.am-ը, եթե իհարկե հրապարակման ենթակա է։
Բնականաբար, տարեկան շրջանառություն հասկացողությունը հանդիսանում է կոմերցիոն գաղտնիք։ Իսկ օգտատերերի քանակի մասին տեղեկատվությունը բաց է և թափանցիկ․ ըստ հեղինակավոր Google Analytics-ի տվյալների Full.am կայք մուտք են գործում 150.000-ից ավել այցելու ամսվա կտրվածքով և մենք ունենք 1.200.000-ից ավել էջի դիտում։ Նշեմ, որ վերը նշված տվյալներն ունեն օրեցօր աճելու միտում:
Ո՞ր կատեգորիաներն են ավելի շատ օգտագործվում օգտատերերի կողմից։
Full.am կայքի ամենաշատ օգտագործվող բաժիններից են անշարժ գույք, աշխատանք, տրանսպորտ և ծառայություններ բաժինները։
Ձեր կայքում նկատելի են լատինատառ գրված հայտարարություններ։ Ինչպե՞ս եք դա գնահատում և արդյո՞ք աշխատում եք այն ուղղությամբ, որ խթանեք հայատառ գրելը։
Այո՛, շատ ճիշտ և արդիական հարց է։ Ցավոք, հայոց մեջ արդի շրջանում գերակշռում է լատինատառ գրելու մոլուցքը։ Գործադրելով մեծագույն ջանքեր՝ մեր կայքի ադմինիստրացիան հետևողականորեն շտկումներ է անում՝ ապահովելով հայատառ բովանդակության առկայությունը։ Նշեմ, որ տվյալ փուլում այս գործողություններն իրականացվում են «Աշխատանք» բաժնում, քանի որ մնացած բոլոր բաժիններում նմանատիպ աշխատանք իրականացնելը պահանջում է ավելի մեծ ջանքեր, իսկ ընթացիկ շրջանում մենք չունենք այդպիսի հնարավորություններ։ Հայատառ գրելու քաղաքականության խթանումը հանդիսանում է առաջնայնություն ոչ միայն մեր կայքի ադմինիստրացիայի համար, այլ կարծում եմ, որ սա համազգային առաքելություն պետք է լինի։ Ամեն դեպքում, պետք է ասեմ, որ քանզի հայտարարություններ տեղադրող քաղաքացիների զգալի մասն օգտվում է լատինատառ այբուբենից, շատ խիստ գրաքննության արդյունքում մեր կայքի օգտատերերի քանակը կարող է և նվազել։
Եվ վերջին հարցը. ինչպե՞ս կգնահատեք էլեկտրոնային առևտրի զարգացման տեմպերը Հայաստանում և ի՞նչ հեռանկարներ ունի այն ըստ ձեզ։
Ժամանակակից Հայաստանում էլեկտրոնային առևտրի զարգացման տեմպերն ավելին քան գոհացուցիչ են։ Ճիշտ և հետևողական աշխատանքի պայմաններում կարելի է հասնել շոշափելի արդյունքների տեսանելի ապագայում։ Ապագայի աշխարհն էլեկտրոնային է․ դա անկասկած է։ Ոմանք համաձայն են այս հայեցակարգի հետ, ոմանք էլ՝ ոչ։ Բայց դա անխուսափելի է ցանկացած ոլորտի մասին խոսելիս արդեն այսօր։
Հարցազրույցը պատրաստեց Azat TV մեդիանախաձեռնության համահիմնադիր՝ Նարեկ Այվազյանը