Եվրամիության 17 անդամ երկրներ Եվրոպական խորհրդի նախագահ Դոնալդ Տուսկին հասցեագրված ուղերձ են ստորագրել՝ կոչ անելով ԵՄ-ի միասնական շուկան պաշտպանել Ֆրանսիայի և Գերմանիայի բարենորոգչական նախաձեռնություններից: Այդ մասին հայտնել է Euobserver ինտերնետ-հրատարակությունը:
«ԵՄ-ի 17 պետություններ Եվրոպական խորհրդի նախագահ Դոնալդ Տուսկին հասցեագրված ուղերձ են ստորագրել, որում նրան կոչ են արել պաշտպանել միասնական շուկայի ազատությունը ֆրանս-գերմանական այնպիսի նախաձեռնությունների ֆոնին, ինչպիսին ԵՄ-ի մյուս երկրներում ժամանակավոր աշխատողների իրավունքների սահմանափակման անցյալ տարվա նախաձեռնությունն է»,-գրում է լրատվամիջոցը:
Երկրների թվում, որոնք ստորագրել են Տուսկին հղված կոչը, Բալթյան երկրներն են, Լեհաստանը, Չեխիան, Բելգիան, Իռլանդիան, Դանիան, Նիդեռլանդները և Շվեդիան:
Ինչպես ավելի վաղ Բրյուսելում ՌԻԱ Նովոստիին հայտարարել է դիվանագիտական աղբյուրը, Ֆրանսիայի և Գերմանիայի միջև համագործակցության և ինտեգրացման վերաբերյալ պայմանագիրը, որը Ֆրանսիայի նախագահ Էմանուել Մակրոնի և Գերմանիայի կանցլեր Անգելա Մերկելի կողմից հունվարի 22-ին ստորագրվել է Ախենում, մարգինալացման վախ է առաջացրել Կենտրոնական և Արևելյան Եվրոպայից Եվրամիության անդամների մոտ:
Գործակալության զրուցակցի խոսքով՝ «Ախենի պայմանագիրը Կենտրոնական և Արևելյան Եվրոպայի մոտ մարգինալացման վախ է առաջացրել G2-ի («մեծ տանդեմի») ստեղծման հեռանկարի և առաջիկա Brexit-ի (ԵՄ-ից Մեծ Բրիտանիայի դուրս գալու) լույսով»:
Աղբյուր՝ 168.am