2026 թվականի ASCO-ի ստամոքս-աղիքային քաղցկեղի սիմպոզիումում ներկայացված նոր տվյալները ցույց են տալիս, որ GLP-1 դեղամիջոցներ ընդունող պացիենտների մոտ հաստ աղիքի քաղցկեղի առաջացման դեպքերը 36%-ով ավելի քիչ են եղել, քան ասպիրին օգտագործողների մոտ: Մասնագետները կարծում են, որ դա պայմանավորված է այս դեղամիջոցների հակաբորբոքային հատկություններով, քանի որ քրոնիկ բորբոքումը հաստ աղիքի քաղցկեղի զարգացման հիմնական գործոններից է:
Միաժամանակ, կալիֆորնիացի հետազոտողները հաստ աղիքի քաղցկեղի աճը, հատկապես 50-ից ցածր տարիքի մարդկանց մոտ, կապում են աղիներում առկա «կոլիբակտին» տոքսինի հետ: Այն արտադրվում է վնասակար բակտերիաների, այդ թվում՝ E. coli-ի որոշ տեսակների կողմից և կարող է վնասել աղիքային բջիջները: Գիտնականները նշում են, որ սննդակարգը, հակաբիոտիկների չարաշահումը և վաղ տարիքում ձեռք բերված աղիքային միկրոֆլորան կարող են մեծացնել ռիսկերը:
Բժիշկները շեշտում են, որ հաստ աղիքի քաղցկեղի դեպքերի մինչև 75%-ը հնարավոր է կանխել ապրելակերպի փոփոխության միջոցով: Ալկոհոլի սահմանափակումը, բջջանյութով հարուստ սննդակարգը և ֆիզիկական ակտիվությունը մնում են հիմնական նախազգուշական միջոցները: Բացի այդ, 45 տարեկանից սկսած կանոնավոր սկրինինգային հետազոտությունները՝ կոլոնոսկոպիան կամ կղանքի անալիզը, վաղ հայտնաբերման ամենաարդյունավետ միջոցներն են: