Հավայան կղզիներում շարունակվող հզոր փոթորիկը, որը մասնագետները բնորոշում են որպես «Կոնա ցածր» ճնշման համակարգ, հանգեցրել է վերջին 20 տարվա ամենածանր ջրհեղեղին: Նահանգապետ Ջոշ Գրինի գնահատմամբ՝ հասցված վնասը կարող է գերազանցել 1 միլիարդ դոլարը՝ վնասելով օդանավակայաններ, դպրոցներ, հիվանդանոցներ և բնակելի տներ: Չնայած Օահու կղզու որոշ հատվածներում տարհանման հրամանները չեղարկվել են, նահանգը շարունակում է մնալ ջրհեղեղի վտանգի տակ, քանի որ ցիկլոնը տեղաշարժվում է դեպի Մաուի և Մեծ կղզի:
Իրավիճակը կրիտիկական է դարձրել 120-ամյա Վահիավա ամբարտակի անվտանգության հարցը: Այն գտնվում է Օահու կղզում և, ըստ պաշտոնական տվյալների, ունի «բարձր վտանգավորության ներուժ»: Թեև ջրի մակարդակը որոշակիորեն նվազել է, իշխանությունները զգուշացնում են, որ հավելյալ տեղումների դեպքում կառույցի ամբողջականությունը կարող է խախտվել: Պետական մարմինները նախատեսում են հաջորդ շաբաթ քվեարկել ամբարտակի ձեռքբերման և վերանորոգման հարցով, ինչը երկար ժամանակ հետաձգվել էր:
Փրկարարական ծառայությունները հասցրել են տարհանել ավելի քան 200 մարդու, այդ թվում՝ Օահուի երիտասարդական ճամբարներից մեկի 72 մասնակիցների: Օդերևութաբանական ծառայությունները զգուշացնում են, որ հաջորդ օրերին սպասվում են նոր տեղումներ, ուստի բնակիչներին կոչ է արվում զերծ մնալ ջրածածկ ճանապարհներից և հետևել տեղական ինքնակառավարման մարմինների հրահանգներին: Նահանգապետ Գրինը ընդգծել է, որ իշխանությունները աշխատում են դաշնային մակարդակով աջակցություն ստանալու ուղղությամբ՝ հաղթահարելու համար այս աղետի հետևանքները: