Չի կարելի 500 հազար դոլարանոց շինություն կառուցել և ենթադրենք ալարել 50 հազար ավել ծախսել պատշաճ սանհանգույց ունենալու համար․ սա նաև քաղաքաշինական նորմերի հարց է։ Այս մասին այսօր՝ հունվարի 9-ին կառավարության նիստի սկզբում հայտարարեց ՀՀ վարչապետ Նիկոլ Փաշինյանը:
Նրա խոսքով՝ Հայաստանում ամենամեծ խնդիրներից մեկը վերաբերում է զուգարաններին, և սա քաղաքակրթական կարևորագույն խնդիր է։
«Երբեմն տեսնում ես, որ որևէ տեղ բացված է 5-աստղանի ռեստորան, աթոռները ոսկեջրած են, բայց երբ զուգարանի դուռը բացում, ներս ես մտնում, քեզ թվում է՝ աղետյալ մի շրջանում ես գտնվում»,-ասաց Փաշինյանը:
Նիստի ժամանակ նշվեց, որ այս ոլորտում փոփոխություններ կարվեն, նաև տուգանքների կխստացվեն սանիտարական նորմերը չպահպանելու համար, ընդհուպ գործունեության կասեցում:
Տարածքային կառավարման և ենթակառուցվածքների նախարար Սուրեն Պապիկյանի խոսքով՝ իրենք ստուգումներ են անցկացրել գազալցակայաններում և դրանց մոտ 80 տոկոսն արդեն ունի սանհանգույց: Նա առաջարկեց նախատեսել նաև ընդհուպ գործունեության արգելք, որպեսզի գազալցակայանների տերերը հասկանան հարցի լրջությունը:
«Եկել է պահը, երբ պետք է պարտադրանքի լեզվով խոսենք: Բոլոր այն օբյեկտները, որոնք նորմերին չեն համապատասխանում, գործունեությունը պետք է արգելել, մինչև այդ խնդիրը կլուծեն»,-հավելեց վարչապետը: